بيىلعى شىلدەدە قازاقستاندا تۇرعىن ءۇي ساتىپ الۋ-ساتۋ بويىنشا 37 158 مامىلە تىركەلدى. بۇل كورسەتكىش ماۋسىممەن سالىستىرعاندا 4،9%-عا، ال بىلتىرعى وسى كەزەڭمەن سالىستىرعاندا 6،5%-عا تومەن، دەپ حابارلايدى infohub.kz.
ەلدەگى تۇرعىن ءۇي باعاسى ءوسىپ كەلە جاتقانىمەن، ءوسۋ قارقىنى باياۋ — ورتا ەسەپپەن ايىنا 1%-دان از. دەگەنمەن، قازىرگى باعا بىلتىرعىدان ايتارلىقتاي جوعارى. سونىمەن قاتار، حالىقتىڭ تۇرعىن ۇيگە سۇرانىسى ايتارلىقتاي تومەندەدى. ۇلتتىق ستاتيستيكا بيۋروسىنىڭ دەرەكتەرىنە سايكەس، شىلدەدە قازاقستاندىقتار 37 158 تۇرعىن ءۇي ساتىپ العان، بۇل ايلىق ساتىلىمنىڭ 4،9%-عا، جىلدىق كورسەتكىشتىڭ 6،5%-عا تومەندەگەنىن كورسەتەدى.
ەلدىڭ بارلىق دەرلىك وڭىرىندە سۇرانىستىڭ تومەندەۋى بايقالادى. تەك التى وڭىردە عانا ءوسىم تىركەلدى: شىمكەنت (+14،2% ايلىق)، باتىس قازاقستان وبلىسى (+14%)، جامبىل وبلىسى (+11،5%)، استانا (+8،7%)، الماتى (+6،2%) جانە جەتىسۋ وبلىسى (+2،8%).
شىلدەدە ەڭ كوپ تۇرعىن ءۇي ساتىپ الۋ-ساتۋ مامىلەسى الماتىدا جاسالدى — 7 263. ەكىنشى ورىندا استانا — 6 999 مامىلە. ۇزدىك ۇشتىكتى قاراعاندى وبلىسى قورىتىندىلايدى، وندا ءبىر ايدا 2 688 مامىلە تىركەلگەن. ەڭ از ساتىلىم ۇلىتاۋ وبلىسىندا — بار بولعانى 311 مامىلە.
ساتىپ الىنعان تۇرعىن ءۇيدىڭ قۇرىلىمىنا كەلەر بولساق، شىلدەدە قازاقستاندىقتار 28 785 پاتەر جانە 8 583 جەكە ءۇي ساتىپ العان. پاتەرلەر اراسىندا ەڭ تانىمالى ەكى بولمەلىلەر — ولار بويىنشا 11 056 مامىلە جاسالعان. ەكىنشى ورىندا ءبىر بولمەلى پاتەرلەر — 10 848 مامىلە، ءۇشىنشى ورىندا ءۇش بولمەلىلەر (5 488 ساتىپ الۋ). بولمەلەرى كوپ پاتەرلەرگە نەبارى 1 183 مامىلە تيەسىلى.
بۇعان دەيىن ساراپشىلار مەملەكەت قۇرىلىس ماتەريالدارىن اكەلۋگە تىيىمدى ۇزارتسا، قازاقستاندا تۇرعىن ءۇي قىمباتتاۋى مۇمكىن دەگەن پىكىر بىلدىرگەن. سونىمەن قاتار، كەيبىر تالداۋشىلار ۇلتتىق بانك بازالىق مولشەرلەمەنى تومەندەتە بەرسە جانە ينفلياسيا تۇراقتى تۇردە باياۋلاسا، يپوتەكا قولجەتىمدىرەك بولۋى مۇمكىن دەپ ەسەپتەيدى. بۇدان بولەك، الماتىدا قاي جەردە تۇرۋ ارزانىراق ەكەنىن ايتىپ وتكەنبىز.