الماتىدا Bek Air اۋەكومپانياسىنىڭ بۇرىنعى باسشىسى نۇرلان جۇماسۇلتانوۆقا قاتىستى تەرگەۋ ءجۇرىپ جاتىر. بۇل تۋرالى جۋرناليست ميحايل كوزاچكوۆ ءوزىنىڭ telegram-ارناسىندا حابارلادى، دەپ جازادى infohub.kz.
كوزاچكوۆتىڭ مالىمەتىنشە، 9 قىركۇيەكتە سوت ەكس-باسشىعا ءۇيقاماق تۇرىندەگى بۇلتارتپاۋ شاراسىن سانكسيالاعان. ءجۋرناليستىڭ اتاپ وتۋىنشە، قىلمىستىق ءىس 2019 جىلعى اۆيااپاتقا قاتىسى جوق.
«وسى قىلمىستىق ىسپەن قاتار، الماتى اۋەجايىنىڭ اۋماعىندا ساقتالعان "فوككەر-100" ۇشاقتارىنىڭ قوزعالتقىشتارىنىڭ جوعالۋىنا بايلانىستى تاعى ءبىر ءىس تەرگەلدى. ۇرلىققا كۋاگەرلەر دە، بەينەجازبا دا بولماعان، ءبىراق اۆيااپاتتان كەيىن ءبىر ءىز اشىلدى. اپاتقا ۇشىراعان "فوككەر-100" ۇشاعىندا ۇرلانعان قوزعالتقىشتاردىڭ بىرەۋى تۇرعان — ونى ءنومىرى بويىنشا انىقتادى. ياعني، بىرەۋ كونسەرۆاسيالانعان ۇشاقتان اۋىر اگرەگاتتى الىپ، ونى Bek Air-عا تيەسىلى لاينەرگە اۋىستىرىپ قويعان»، — دەلىنگەن اۆتوردىڭ جازباسىندا.
باس كولىك پروكۋراتۋراسى NUR.KZ تىلشىسىنە ءىس بويىنشا تەرگەۋ جۇرگىزىلىپ جاتقانىن راستادى. «ءىستى ۇقك ورتالىق اپپاراتى تەرگەپ جاتىر، قاداعالاۋدى بكپ جۇزەگە اسىرادى. قىلمىستىق ءىس جۇرگىزۋ كودەكسىنىڭ 201-بابىنا سايكەس وزگە اقپارات جاريا ەتۋگە جاتپايدى»، — دەدى ۆەدومستۆودا.