2026 جىلدىڭ ماۋسىم-تامىز ايلارىندا قازاقستاندا ۇلتتىق قاۋىپسىزدىك كوميتەتى تەرگەگەن قىلمىستىق ىستەر بويىنشا تەرروريستىك جانە ەكسترەميستىك باعىتتاعى قىلمىستار ءۇشىن 19 ادام ءارتۇرلى مەرزىمگە باس بوستاندىعىنان ايىرىلدى، دەپ حابارلايدى infohub.kz سايتى.
ۆەدومستۆونىڭ رەسمي Telegram-ارناسىندا حابارلانعانداي، سوتتالعانداردىڭ اراسىندا — 2017 جىلدان بەرى حالىقارالىق تەرروريستىك ۇيىمداردىڭ قىزمەتىنە قاتىسقانى ءۇشىن ىزدەۋدە جۇرگەن الماتى تۋماسى بار. ول تۇركيادان تابىلىپ، 2025 جىلى وتانعا دەپورتاسيالانىپ، قاماۋعا الىندى. سوت شەشىمىمەن ول 8 جىلعا باس بوستاندىعىنان ايىرىلدى.
تاعى ءبىر ايىپتالۋشى — شىمكەنت تۇرعىنى، ول الەۋمەتتىك جەلىلەردە تەرروريزم يدەولوگياسىن ناسيحاتتاپ، زورلىق-زومبىلىق ارەكەتتەرگە شاقىرعان. وعان 9 جىل باس بوستاندىعىنان ايىرۋ جازاسى تاعايىندالدى.
سول كەزەڭدە استانا، الماتى، شىمكەنت قالالارىندا، سونداي-اق اقمولا، اقتوبە، الماتى، جامبىل، ماڭعىستاۋ جانە تۇركىستان وبلىستارىندا جەدەل-ىزدەستىرۋ ءىس-شارالارى بارىسىندا 28 ادام ۇستالدى. ولار تەرروريزمدى ناسيحاتتاۋ، ءدىني الاۋىزدىقتى قوزدىرۋ، ينتەرنەتتە جانە ءوز ورتاسىندا تىيىم سالىنعان ماتەريالداردى تاراتۋ، سونداي-اق ەكسترەميستىك ۇيىم قىزمەتىنە قاتىسۋ كۇدىگىنە ءىلىندى.
قازىرگى ۋاقىتتا قىلمىستىق كودەكستىڭ ءتيىستى باپتارى بويىنشا سوتقا دەيىنگى تەرگەۋ امالدارى جۇرگىزىلۋدە. قازاقستان رەسپۋبليكاسى قىلمىستىق پروسەستىك كودەكسىنىڭ 201-بابىنىڭ 1-بولىگىنە سايكەس وزگە اقپارات جاريا ەتىلمەيدى.