قازاقستان پرەزيدەنتى قاسىم-جومارت توقايەۆ ۇلتتىق بانك ءتوراعاسى تيمۋر سۇلەيمەنوۆتى قابىلدادى، ول 2026 جىلعى قاڭتار-شىلدە ارالىعىنداعى اقشا-كرەديت ساياساتىنىڭ قورىتىندىلارى تۋرالى باياندادى، دەپ حابارلايدى infohub.kz سايتى.
تيمۋر سۇلەيمەنوۆ مەملەكەت باسشىسىنا ەكونوميكاداعى احۋال، ىسكەرلىك بەلسەندىلىك، ينفلياسيا فاكتورلارى جانە باعانى تۇراقتاندىرۋ ءۇشىن قابىلدانىپ جاتقان شارالار تۋرالى اقپارات بەردى. جىلدىق ينفلياسيا قاتارىنان ونىنشى اي بويى تومەندەپ، شىلدەدە 10،2 پايىزدى قۇرادى. بۇعان جۇرگىزىلىپ جاتقان اقشا-كرەديت ساياساتى، تەڭگەنىڭ باعامىنىڭ نىعايۋى، تۇتىنۋ بەلسەندىلىگىنىڭ تۇراقتانۋى، سونداي-اق ۇكىمەت پەن ۇلتتىق بانكتىڭ كەلىسىلگەن ينفلياسياعا قارسى شارالار كەشەنى ىقپال ەتىپ وتىر.
ۇلتتىق بانك ءتوراعاسى ەكونوميكانى كرەديتتەۋ ديناميكاسى تۋرالى دا باياندادى. 2026 جىلعى 1 شىلدەدەگى جاعداي بويىنشا بانكتەردىڭ بيزنەسكە بەرگەن نەسيە پورتفەلى جىلدىق ماندە 17،1 پايىزعا ءوستى، ال شاعىن جانە ورتا بيزنەستى كرەديتتەۋ قارقىنى 29،6 پايىزعا دەيىن جەدەلدەدى. سونىمەن قاتار تۇتىنۋ نەسيەلەرىنىڭ ءوسۋى جىل باسىنداعى 21،0 پايىزدان 13،0 پايىزعا دەيىن باياۋلادى، بۇل قابىلدانعان پرۋدەنسيالىق شارالاردىڭ تيىمدىلىگىن جانە تۇتىنۋ كرەديتتەۋ قارقىنىنىڭ قالىپقا كەلۋىن كورسەتەدى. وسىلايشا، نەسيە رەسۋرستارى بيزنەستى قارجىلاندىرۋ پايداسىنا قايتا بولىنۋدە.
سونىمەن قاتار، تيمۋر سۇلەيمەنوۆ ۆاليۋتا نارىعىنداعى احۋال، ۇلتتىق قور مەن بجزق اكتيۆتەرىنىڭ جاي-كۇيى، سونداي-اق ەلدىڭ التىن-ۆاليۋتا رەزەرۆتەرى تۋرالى حابارلادى. اعىمداعى جىلدىڭ 1 شىلدەسىندەگى جاعداي بويىنشا ۇلتتىق قور مەن اۆر-دىڭ جيىنتىق كولەمى 127،3 ملرد دوللاردى قۇرادى. ۇلتتىق قوردىڭ وسى جىلدىڭ ءبىرىنشى جارتىجىلدىعىنداعى ينۆەستيسيالىق كىرىسى 2،3 ملرد دوللارعا جەتتى. بجزق زەينەتاقى اكتيۆتەرى 27،8 ترلن تەڭگەنى قۇراپ، جىل باسىنان بەرى 1،7 ترلن تەڭگەگە ءوستى.
Alatau City قارجى ەكوجۇيەسىن دامىتۋ ءۇشىن ۇلتتىق بانك كاپيتالدىڭ جىلدام جانە يكەمدى قوزعالىسىنا، سونداي-اق قالانىڭ دامۋىنا ينۆەستيسيالار تارتۋعا باعىتتالعان شارالاردى ازىرلەدى.
ۇلتتىق بانك ءتوراعاسى پرەزيدەنتتىڭ سيفرلىق قارجى اكتيۆتەرى يندۋسترياسىن جانە ۇلتتىق سيفرلىق قارجى ينفراقۇرىلىمىن دامىتۋ جونىندەگى تاپسىرمالارىنىڭ ورىندالۋ بارىسى تۋرالى اقپارات ۇسىندى. جاڭا باعىتتاردىڭ قاتارىندا – ترانسشەكارالىق تولەمدەر ءۇشىن ستەيبلكويندەردى پايدالانۋ، ينفراقۇرىلىمدى دامىتۋ جانە توكەنيزاسيالانعان مەملەكەتتىك اكتيۆتەردى شىعارۋ. سونداي-اق تولەم نارىعىنىڭ جاڭا سەگمەنتى – ءبىرىنشى ساناتتاعى ليسەنزيالاناتىن تولەم ۇيىمدارى ەنگىزىلدى. بۇل باسەكەلەستىكتىڭ دامۋىن ىنتالاندىرۋعا، كليەنتتەردىڭ شىعىندارىن ازايتۋعا، سونداي-اق حالىق پەن بيزنەس ءۇشىن سيفرلىق يننوۆاسيالىق سەرۆيستەردىڭ قولجەتىمدىلىگىن كەڭەيتۋگە مۇمكىندىك بەرەدى.
ۇلتتىق تولەم جۇيەسى اياسىندا 19 شىلدەدەن باستاپ كەز كەلگەن بانك كليەنتتەرى اراسىندا QR-تولەمدەر مەن تەلەفون ءنومىرى بويىنشا اۋدارىمدار ىسكە قوسىلدى. ىسكە قوسىلعاننان بەرى جۇيەدە 170 ملرد تەڭگەگە 6،5 ملن وپەراسيا وڭدەلدى.
ۇلتتىق بانك باعا تۇراقتىلىعىن قامتاماسىز ەتۋ جانە ينفلياسيا بويىنشا ورتا مەرزىمدى 5 پايىزدىق ماقساتقا قول جەتكىزۋ ءۇشىن بارلىق قاجەتتى شارالاردى قابىلداۋدا. پرەزيدەنت ۇلتتىق بانك قىزمەتى بويىنشا ءبىرقاتار مىندەت قويىپ، ينفلياسيانى ودان ءارى تۇراقتاندىرۋدىڭ ماڭىزدىلىعىن اتاپ ءوتتى.