قازاقستان ۇلتتىق بانكىنىڭ تاپسىرىسى بويىنشا جۇرگىزىلگەن ساۋالناماعا سايكەس، قازاقستاندىقتاردىڭ 52،3%-ى سوڭعى ءبىر جىلدا ماتەريالدىق جاعدايى وزگەرمەگەنىن، ال 27%-ى ناشارلاعانىن ايتقان. ناتيجەلەر ساۋىردە جۇرگىزىلگەن زەرتتەۋگە قاراعاندا وڭ بولىپ وتىر، دەپ حابارلايدى infohub.kz سايتى.
ۇلتتىق بانك FusionLab كومپانياسى جۇرگىزگەن شىلدەدەگى حالىقتىڭ ينفلياسيالىق كۇتۋلەرى بويىنشا ساۋالناما ناتيجەلەرىن ۇسىندى. ساۋالناماعا ءارتۇرلى وڭىرلەردەن 1،5 مىڭ قازاقستاندىق قاتىستى.
سوڭعى ءبىر جىلدا ماتەريالدىق جاعدايىڭىز قالاي وزگەردى دەگەن سۇراققا رەسپوندەنتتەردىڭ كوپشىلىگى – 52،3% – وزگەرمەگەنىن ايتتى. ساۋىردە جۇرگىزىلگەن الدىڭعى ساۋالنامادا بۇل پىكىردى قازاقستاندىقتاردىڭ 48،4%-ى بىلدىرگەن ەدى، ال ءبىر جىل بۇرىن – 49،9%.
سونىمەن قاتار، ساۋالناماعا قاتىسقانداردىڭ 27%-ى ءال-اۋقاتىنىڭ ناشارلاعانىن مالىمدەدى. ساۋىرمەن سالىستىرعاندا كەدەيلەنگەنىن ايتقانداردىڭ ۇلەسى 7،3 پايىزدىق تارماققا، ال جىلدىق كورسەتكىشپەن سالىستىرعاندا 1،4 پ.ت. تومەندەگەن. قازاقستاندىقتاردىڭ 14،8%-ى ءبىر جىل ىشىندە ماتەريالدىق جاعدايى جاقسارعانىن سانايدى. ساۋىردە بۇل پىكىردى 12،1% بىلدىرگەن.
قازاقستاندىقتاردىڭ بولاشاقتاعى ماتەريالدىق ءال-اۋقاتىنا قاتىستى ءوپتيميزمى دە ارتقان. 28،8% جاقىن ءبىر جىلدا ول جاقسارادى دەپ سانايدى (بۇرىن 22،6%)، ال 16،7% ناشارلاۋدى كۇتەدى (بۇرىن 20،7%). 35،6% ءال-اۋقاتى وزگەرمەيدى دەپ ەسەپتەيدى.
وتباسىنىڭ ايلىق تابىس دەڭگەيى تۋرالى ايتا كەلە، قازاقستاندىقتاردىڭ 28،6%-ى ول 150 مىڭنان 300 مىڭ تەڭگەگە دەيىن قۇرايتىنىن مالىمدەدى. 23،3% وتباسى تابىسى 300 مىڭنان اساتىنىن، ءبىراق 500 مىڭ تەڭگەگە جەتپەيتىنىن ايتادى. 14،1%-دىڭ تابىسى ايىنا 500 مىڭ تەڭگەدەن اسادى.
بۇعان دەيىن ۇلتتىق بانك ساۋالناماسى قازاقستاندىقتاردىڭ ۇشتەن ءبىرى نەسيەلەرگە 100 مىڭ تەڭگەدەن استام جۇمسايتىنىن كورسەتكەن.