Finprom كومپانياسىنىڭ ساراپشىلارى قازاقستاننىڭ ۇلتتىق كومپانيالارىنىڭ توپ-مەنەدجەرلەرىنە تولەنەتىن سىياقىلار تۋرالى دەرەكتەردى جاريالاپ، تولەم كولەمى بويىنشا كوش باستاعان ۇيىمداردى انىقتادى، دەپ حابارلايدى infohub.kz سايتى.

ساراپشىلاردىڭ ەسەبىنە سايكەس، قازىرگى تاڭدا ەلدە ۇلتتىق باسقارۋشى حولدينگتەر مەن ۇلتتىق حولدينگتەردى قوسا العاندا، 22 ۇلتتىق كومپانيا جۇمىس ىستەيدى.

2025 جىلى بارلىق ۇلتتىق كومپانيالاردىڭ ىشىندە اتقارۋشى ورگان مۇشەلەرىنە ەڭ كوپ جيىنتىق سىياقىنى «قازاتومپروم» ۇلتتىق اتوم كومپانياسى تولەدى — 903،3 ملن تەڭگە.

جالپى سىياقى سوماسى بويىنشا ودان كەيىن «قازاقستان تەمىر جولى» — 721،3 ملن تەڭگە جانە «قازمۇنايگاز» — 519،1 ملن تەڭگە تۇر.

اتقارۋشى ورگان مۇشەلەرىنە تولەمدەر بويىنشا توپ-10 قاتارىنا سونداي-اق مىنالار ەندى: QazaqGaz — 515،2 ملن تەڭگە؛ «كازاحتەلەكوم» — 504،1 ملن تەڭگە؛ KEGOC — 496،3 ملن تەڭگە؛ «بايتەرەك» ۇبح — 440،4 ملن تەڭگە؛ «قازاقستاننىڭ ەكسپورتتىق-كرەديتتىك اگەنتتىگى» — 283،3 ملن تەڭگە؛ «ۇلتتىق اقپاراتتىق تەحنولوگيالار» («ۇات») — 188،4 ملن تەڭگە؛ «تاۋ-كەن سامۇرىق» — 170،9 ملن تەڭگە.

ساراپشىلار ءار ۇلتتىق كومپانيادا اتقارۋشى ورگان مۇشەلەرىنىڭ سانى ءارتۇرلى ەكەنىن ناقتىلايدى. ءبىر كومپانيادا اق مۇشەسى بىرەۋ-اق بولۋى مۇمكىن، ەندى بىرىندە — 10-نان استام. بۇل رەتتە سىياقى مولشەرى تۋرالى اقپارات جالپى سومانى بىلدىرەدى.

«اقپاراتى بار ۇلتتىق كومپانيالاردىڭ بارلىعىندا دەرلىك اق مۇشەلەرىنىڭ سىياقى سوماسى ءوستى. جيىنتىق تولەمدەردىڭ قىسقارۋى تەك ءتورت كومپانيادا بايقالدى، ولاردىڭ قاتارىندا „كازاحتەلەكوم“ (مينۋس 130،5 ملن تەڭگە)، „قازاقستان عارىش ساپارى“ (مينۋس 69،2 ملن تەڭگە)، „قازپوشتا“ (مينۋس 26،7 ملن تەڭگە)، Kazakh Tourism (مينۋس 6،2 ملن تەڭگە) بولدى»، — دەلىنگەن حابارلامادا.

سىياقى سوماسىنىڭ ەڭ ۇلكەن ءوسىمى نارىق كوشباسشىسى «قازاتومپروم» ۇلتتىق اتوم كومپانياسىندا بايقالدى — ءبىر جىلدا بىردەن 226،7 ملن تەڭگەگە، ياعني 33،5%-عا ءوستى — ايتارلىقتاي ۇستەمە. سونداي-اق QazaqGaz (94،5 ملن تەڭگەگە، ياعني 22،5%-عا) جانە «ۇات» (86،9 ملن تەڭگەگە، ياعني 85،7%-عا) اق مۇشەلەرىنە تولەمدەردى ەداۋىر ۇلعايتتى.

2025 جىلى اتقارۋشى ورگاننىڭ ءبىر مۇشەسىنە ورتا ەسەپپەن ەڭ كوپ تولەگەندەر: «قازاتومپروم» — 112،9 ملن تەڭگە؛ KEGOC — 99،3 ملن تەڭگە؛ «بايتەرەك» ۇبح — 62،9 ملن تەڭگە؛ «قازمۇنايگاز» — 57،7 ملن تەڭگە؛ «قازاقستاننىڭ ەكسپورتتىق-كرەديتتىك اگەنتتىگى» — 56،7 ملن تەڭگە.

ءارتۇرلى ۇلتتىق كومپانيالار بولىنىسىندە اق ءبىر مۇشەسىنە شاققانداعى ورتاشا سىياقى سوماسى 7،8 ملن-نان 112،9 ملن تەڭگەگە دەيىنگى ارالىقتا وزگەرىپ، شامامەن 15 ەسەگە ايىرماشىلىق تانىتتى. ياعني ءبىر كومپانيادا توپ-مەنەدجەر ايىنا 9 ملن تەڭگەدەن استام تابىس تاپسا، ەندى بىرىندە — 500 مىڭ تەڭگەدەن ءسال استام. جالپى العاندا، 22 ۇلتتىق كومپانيانىڭ 13-ىندە اق ءبىر مۇشەسىنە ورتا ەسەپپەن ايىنا 2 ملن تەڭگەدەن استام سىياقى تولەندى.