«ۇماي» جەڭىلدىك يپوتەكا باعدارلاماسى قازاقستاندا ۇلكەن قىزىعۋشىلىق تۋدىردى: ءبىرىنشى ترانش بويىنشا وتىنىمدەر بىرنەشە ساعاتتىڭ ىشىندە جابىلىپ، سۇرالعان قارىزدىڭ ورتاشا سوماسى 23،4 ميلليون تەڭگەنى قۇرادى. قوسىمشا ترانش بولىنە مە دەگەن سۇراققا ورتالىق كوممۋنيكاسيالار قىزمەتىندە وتكەن بريفينگتە «وتباسى بانكى» باسقارما ءتوراعاسىنىڭ ورىنباسارى جانسۇلتان ماتاي جاۋاپ بەردى، دەپ حابارلايدى infohub.kz سايتى.
جۋرناليستەر «ۇماي» باعدارلاماسىنىڭ ءبىرىنشى ترانشى بويىنشا ءوتىنىم قابىلداۋ بىرنەشە ساعات ىشىندە اياقتالعانىنا نازار اۋداردى. ولاردىڭ ايتۋىنشا، باسقا دا ءتيىمدى تۇرعىن ءۇي باعدارلامالارىندا سۇرانىس ۇسىنىستان اسىپ تۇسكەن. ب ا ق وكىلدەرى قالىپتاسقان قاجەتتىلىكتى جابۋ ءۇشىن قارجىلاندىرۋدى ۇلعايتۋ جوسپارلانىپ وتىر ما دەپ سۇرادى.
«31 تامىزدا „ۇماي“ باعدارلاماسى باستالىپ، قاتىسۋشى ايەلدەردەن 855 ءوتىنىم قابىلداندى. ولاردىڭ بارلىعى الدىن الا ماقۇلداندى. ەندى ولاردىڭ پاتەر ىزدەۋگە جانە كرەديت راسىمدەۋگە ۋاقىتى بار. „ۇماي“ باعدارلاماسىنا قاتىسۋشىلار اراسىندا سۇرالعان قارىزدىڭ ورتاشا سوماسى 23،4 ميلليون تەڭگە ەكەنىن اتاپ وتكىم كەلەدى. ەڭ جاس قاتىسۋشى — 18 جاستا. ەڭ ۇلكەنى — 63 جاستا»، — دەدى جانسۇلتان ماتاي.
سونىمەن قاتار ول بۇل باعدارلامانى ىسكە اسىرۋعا قاراجاتتى ازيا دامۋ بانكى بولگەنىن ەسكە سالدى.
«ادب „وتباسى بانكىنە“ 9 ميلليارد تەڭگە كولەمىندەگى ءبىرىنشى ترانشتى الدىن الا اۋداردى. قازاقستاندىق ايەلدەر تاراپىنان جوعارى بەلسەندىلىكتى ەسكەرە وتىرىپ، „وتباسى بانكى“ ادب-عا ەكىنشى ترانشتى مەرزىمىنەن بۇرىن ءبولۋ تۋرالى ءوتىنىش جاسادى. باعدارلاماعا بارلىعى 90 ميلليارد تەڭگە قاراستىرىلعان. قاتىسۋشىلارعا قويىلاتىن تالاپتار ازىرگە وزگەرمەيدى»، — دەپ سەندىردى «وتباسى بانكى» باسقارما ءتوراعاسىنىڭ ورىنباسارى.