27 شىلدەدە ورالداعى قالالىق قوقىس پوليگونىندا ءورت شىعىپ، سوعان بايلانىستى توتەنشە جاعداي رەجيمى ەنگىزىلدى. قالا اكىمدىگى وسى شەشىمدى قابىلدادى، دەپ حابارلايدى infohub.kz.
ورال اكىمىنىڭ ورىنباسارى جاندوس دۇيسەنعاليەۆتىڭ ايتۋىنشا، قاتتى تۇرمىستىق قالدىقتار پوليگونى 27 شىلدەدە ساعات 14:30-دا ورتەنگەن. ول كۇنى انومالدى ىستىق بولىپ، جەلدىڭ سالدارىنان ءورت كۇشەيگەن. ءورتتى سوندىرۋگە باتىس قازاقستان وبلىسى توتەنشە جاعدايلار دەپارتامەنتى مەن اكىمدىگىنىڭ كۇشتەرى، سونداي-اق بارلىق كوممۋنالدىق قىزمەتتەر مەن قۇرىلىس كومپانيالارىنىڭ ارنايى تەحنيكاسى جۇمىلدىرىلدى.
28 شىلدەدە ورال اكىمدىگىنىڭ شەشىمىمەن جەرگىلىكتى دەڭگەيدەگى تج رەجيمى جاريالاندى. دۇيسەنعاليەۆتىڭ تۇسىندىرۋىنشە، بۇل ارنايى تەحنيكانى جانارمايمەن جانە قىزمەتكەرلەردى تاماقپەن ۇزدىكسىز قامتاماسىز ەتۋ ءۇشىن جاسالدى. رەجيم پوليگونداعى ءورت تولىق وقشاۋلانعانعا دەيىن جۇمىس ىستەيدى. ءقازىر 40–50 بىرلىك تەحنيكا جۇمىلدىرىلعان. پوليگون اۋدانى — 35 گەكتار، ءورت 13 گەكتاردى قامتىدى. ءۇش گەكتارداعى ءورت سوندىرىلگەن، تاعى ون گەكتارداي جەر اشىق جالىنمەن جانباسا دا، كۇيرەپ جاتىر.
1975 جىلى اشىلعان پوليگون 50 جىلدان استام ۋاقىت جۇمىس ىستەپ كەلەدى. اكىم ورىنباسارىنىڭ ايتۋىنشا، سوڭعى جىلدارى پوليگوندى جاۋىپ، رەكۋلتيۆاسيالاۋ جۇمىستارى جۇرگىزىلۋدە، ويتكەنى نىسان تولىق توزىپ بىتكەن. مامانداردىڭ پىكىرىنشە، پوليگوندا كوپ مولشەردە جەر استى گازى جينالعان، اۋا رايىنا بايلانىستى قايتا ءورت شىعۋى مۇمكىن. «ءبىز ءقازىر كارەردەن توپىراق اكەلىپ، كۇيرەپ جاتقان جەرلەردى كومىپ جاتىرمىز. 2024 جىلى پوليگوندى رەكۋلتيۆاسيالاۋ جوباسى ازىرلەندى، ءقازىر ونى ىسكە اسىرۋ ءۇشىن قارجىلاندىرۋدى قاراستىرىپ جاتىرمىز. رەكۋلتيۆاسياسىز بۇل وسىلاي جالعاسا بەرەدى»، — دەپ قوستى شەنەۋنىك.
كەشە ورال تۇرعىندارى قالانىڭ قاتتى تۇتىندەگەنىنە شاعىمداندى، بۇل تۋرالى باتىس قازاقستان وبلىسى اكىمدىگىنە دە ءمالىم بولدى.