Moderna مەن Merck فارماسەۆتيكالىق كومپانيالارى ازىرلەگەن تەرى قاتەرلى ىسىگىنە قارسى جاڭا جەكەلەندىرىلگەن ۆاكسينا كلينيكالىق سىناقتاردا ءۇمىت كۇتتىرەتىن ناتيجە كورسەتتى: مەلانومامەن اۋىراتىن ناۋقاستاردا وپەراسيادان كەيىن يممۋنوتەراپيانى جالعىز قولدانعانعا قاراعاندا، قايتالانۋ سيرەك بايقالعان، دەپ حابارلايدى infohub.kz سايتى.
Intismeran دەپ اتالاتىن پرەپارات ءار پاسيەنتكە جەكە جاسالادى. ىسىكتى الىپ تاستاعاننان كەيىن ادامنان كىشكەنە فراگمەنت الىپ، ونىڭ دنق-سىن تالدايدى. سودان كەيىن عالىمدار ءدال وسى ىسىككە ءتان مۋتاسيالاردى انىقتاپ، سولاردىڭ نەگىزىندە جەكەلەندىرىلگەن مرنق ۆاكسيناسىن جاسايدى. ول يممۋندىق جۇيەنى قالعان قاتەرلى جاسۋشالاردى تانۋعا جانە ولارعا شابۋىل جاساۋعا «ۇيرەتۋى» ءتيىس. ۇقساس پرينسيپ كەيبىر COVID-19 ۆاكسينالارىندا قولدانىلعان.
كلينيكالىق زەرتتەۋدىڭ ءۇشىنشى فازاسىنا جوعارى ءقاۋىپتى مەلانوماسى (II، III نەمەسە IV كەزەڭ) بار 1000-نان استام پاسيەنت قاتىستى. قاتىسۋشىلاردى توپتارعا ءبولدى: بىرەۋلەرى تەك Keytruda پرەپاراتىن الدى، ال باسقالارى Keytruda-نى جەكەلەندىرىلگەن ۆاكسينامەن بىرگە الدى. الدىن الا ناتيجەلەر بويىنشا، ەكى پرەپاراتتىڭ كومبيناسياسى پاسيەنتتەردىڭ قاتەرلى ىسىك بەلگىلەرىنسىز ءومىر ءسۇرۋ ۋاقىتىن ايتارلىقتاي ۇزارتتى جانە اۋرۋدىڭ باسقا ورگاندارعا تارالۋ ءقاۋپىن تومەندەتتى. دەگەنمەن، بۇل اسەردىڭ قانشا ۋاقىت ساقتالاتىنى ازىرگە بەلگىسىز.
عالىمدار باعالاۋدا ساقتىق تانىتۋدا. Cancer Research UK ۇيىمى زەرتتەۋ «ءۇمىت كۇتتىرەتىن ناتيجەلەر كورسەتىپ وتىر» دەپ مالىمدەدى، الايدا دەرەكتەردى ءالى دە تولىق زەرتتەپ، تەكسەرۋ قاجەت. وكسفورد ۋنيۆەرسيتەتىنىڭ كونسۋلتانتى جانە دوسەنتى، ونكولوگ لەننارد لي ناتيجەلەردى مەلانومامەن اۋىراتىن پاسيەنتتەر ءۇشىن جاقسى جاڭالىق دەپ اتادى. ءبىراق ناتيجەلەر ازىرگە تاۋەلسىز ساراپشىلاردىڭ رەسەنزياسىنان وتپەگەن، سوندىقتان تۇپكىلىكتى قورىتىندى جاساۋعا ءالى ەرتە.
Moderna مەن Merck وكپە، قۋىق جانە بۇيرەك قاتەرلى ىسىگىن ەمدەۋگە ارنالعان ۇقساس جەكەلەندىرىلگەن ۆاكسينالاردى دا زەرتتەپ جاتىر.