قازاقستاننىڭ فۋتبولدان ۇلتتىق قۇراماسىنىڭ باس باپكەرى دجون ۆان 'ت سحيپ مولدوۆا كومانداسىنان ءوز الاڭىندا جەڭىلگەن سوڭ وتستاۆكاعا كەتۋ مۇمكىندىگىن ءتۇسىندىردى، دەپ حابارلايدى infohub.kz سايتى.
مامان مولدوۆا كومانداسىنا قارسى ماچتاعى ءوزىنىڭ باپكەرلىك شەشىمىن قاتە دەپ اتادى. «مەنىڭشە، بۇل — باپكەر رەتىندەگى مەنىڭ قاتەم: مولدوۆاعا قارسى شابۋىلداۋ تاسىلىمەن ويناپ، جارتىلاي قورعاۋشىلاردى شەپتەر اراسىنا ورنالاستىرعىم كەلدى. وكىنىشكە قاراي، بۇدان پايدا كورمەدىك. ەسەپتى تەڭەستىرۋ ءۇشىن ءبارىن جاسادىق، ءبىراق فۋتبولدا ساتتىلىك تە كەرەك، بۇگىن ول بىزگە جەتپەدى»، — دەپ كەلتىرەدى ونىڭ ءسوزىن ASnews.kz.
باپكەردىڭ ايتۋىنشا، ەندى «ءوز الاڭىنداعى جەڭىلىستەر مەن سلوۆاكيامەن ساتسىزدىكتەن كەيىن توپتا جەڭىسكە جەتۋ وتە قيىن بولادى». ول كوماندا اقتالۋعا تىرىسىپ، جەڭىسكە دەگەن قۇشتارلىق پەن ەرىك-جىگەرى بار ەكەنىن كورسەتەتىنىن مالىمدەدى.
ۆان 'ت سحيپتەن مولدوۆادان جەڭىلگەن سوڭ قىزمەتىنەن كەتۋدى جوسپارلاپ وتىرماعانى دا سۇرالدى. «وتستاۆكاعا شاقىرۋلارعا كەلسەك — ونى مەن شەشپەيمىن. جۇمىستى جالعاستىرۋعا ۇمىتتەنەمىن. جەڭگەندە دوستارىڭ كوپ بولاتىنى، ال جەڭىلگەندە ولاردىڭ مۇلدەم دەرلىك جوقتىعى تۇسىنىكتى. بۇل — باپكەر جۇمىسىنىڭ ءبىر بولىگى»، — دەپ جاۋاپ بەردى ول.
ەسكە سالايىق، الدىڭعى كۇنى قازاقستاننىڭ ەرلەر فۋتبول قۇراماسى ۋەفا ۇلتتار ليگاسىنىڭ 2026/27 ماۋسىمى اياسىندا مولدوۆا كومانداسىنان ءوز الاڭىندا جەڭىلدى. قوناقتار 2:1 ەسەبىمەن جەڭىسكە جەتتى.
ۇلتتىق قۇراما قاتارىنان ەكىنشى رەت جەڭىلىس تاپتى. نيدەرلاندتىق باپكەر دجون ۆان 'ت ءسحيپتىڭ جەتەكشىلىگىمەن ول ازىرگە جەڭىسكە جەتپەدى.