قىتايدىڭ تيانسزين قالاسىندا ايەلدەر اراسىنداعى ۆولەيبولدان ازيا چەمپيوناتىنىڭ 23ء-شى جارىسى باستالدى. بۇل دوداعا قازاقستان قۇراماسى دا قاتىسىپ جاتىر، دەپ حابارلايدى infohub.kz سايتى.
ازيانىڭ ون ەكى ۇلتتىق قۇراماسى باس جۇلدەنى ساراپقا سالادى. چەمپيون اتانعاندار 2028 جىلى لوس-اندجەلەستە وتەتىن وليمپيادا ويىندارىنا جولداما الادى، ال جۇلدەگەرلەر 2027 جىلى كانادا مەن اقش-تا وتەتىن الەم چەمپيوناتىنا قاتىسۋعا مۇمكىندىك الادى.
توپتىق كەزەڭدە قازاقستان قۇراماسى ۆ توبىندا تايلاند، يندونەزيا جانە اۆستراليا قۇرامالارىمەن بىرگە وينايدى. ا توبىندا جۇڭگو، يران، جۇڭگو تايبەيى جانە يراك، ال س توبىندا جاپونيا، ۆەتنام، وڭتۇستىك كورەيا جانە گونكونگ ونەر كورسەتەدى. شيرەك فينالعا ءار توپتان ەكى ۇزدىك كوماندا، سونداي-اق ءۇشىنشى ورىن العان ەڭ ۇزدىك ەكى قۇراما شىعادى.
ءتۋرنيردىڭ العاشقى ويىنىندا ا توبىنداعى يراندىق ۆولەيبولشىلار جۇڭگو تايبەيى قۇراماسىن 3:1 ەسەبىمەن جەڭدى. قازاقستان قۇراماسى العاشقى ويىنىن ەرتەڭ يندونەزياعا قارسى وتكىزەدى. فيليپپيندە وتكەن ازيا ۇلتتارى كۋبوگىندا قازاقستاندىق قىزدار ءتورتىنشى ورىن العان بولاتىن، سول جارىستا ولار يندونەزيالىقتاردى 3:0 ەسەبىمەن ۇتقان ەدى.
23 تامىزدا اسقار شاكىبەكوۆ شاكىرتتەرى اۆستراليالىقتارمەن، ال 25-ىندە تايلاندتىقتارمەن وينايدى.
ايەلدەر اراسىنداعى ۆولەيبولدان تۇڭعىش ازيا چەمپيوناتى 1975 جىلى مەلبۋرندە وتكەن بولاتىن. 22 تۋرنير بويى جۇلدەلى ورىنداردى جۇڭگو، جاپونيا، تايلاند جانە وڭتۇستىك كورەيا قۇرامالارى بولىسكەن، ءبىراق ءبىر رەت ولاردىڭ اراسىنا قازاقستان كىردى. 2005 جىلى قازاقستاندىق ۆولەيبولشىلار فينالدا قىتايلىقتاردان 0:3 ەسەبىمەن جەڭىلىپ، كۇمىس جۇلدەنى يەلەندى.
بۇدان كەيىن دە، بۇعان دەيىن دە قازاقستاندىقتار كونتينەنتتىك دودادا بەسىنشى ورىننان جوعارى كوتەرىلگەن ەمەس. تايلاندتا وتكەن وتكەن ازيا چەمپيوناتىندا دا ولار بەسىنشى ورىنعا تۇراقتاعان ەدى. سول جارىستا تايلاندتىقتار قاتارىنان ءۇشىنشى رەت چەمپيون اتاندى، كۇمىس قىتايعا، قولا جاپونياعا بۇيىردى.