قازاقستاندىق بوكسشى جانىبەك اليمحان ۇلىنان ديسكۆاليفيكاسيا مەرزىمىنەن بۇرىن الىنىپ، ول WBO نۇسقاسى بويىنشا سۋپەر ورتا سالماقتا الەم چەمپيونى اتاعىنا ۇمىتكەر بولىپ تاعايىندالدى، دەپ حابارلايدى infohub.kz سايتى.
دۇنيەجۇزىلىك بوكس ۇيىمىنىڭ (WBO) سايتىندا الەم چەمپيوناتتارى كوميتەتى سۋپەر ورتا سالماقتا WBO الەم چەمپيونى اتاعىنا ۇمىتكەردى تاعايىنداۋ تۋرالى شەشىم قابىلداعانىن مالىمدەدى.
«كوميتەت جانىبەك اليمحان ۇلىن ەڭ جوعارى رەيتينگكە يە بوكسشى دەپ انىقتايدى، ول الەم چەمپيوناتى كوميتەتىنىڭ پىكىرىنشە، مىندەتتى ۇمىتكەر مارتەبەسىن بەرۋ ءۇشىن قولدانىلاتىن ولشەمشارتتارعا بارىنشا سايكەس كەلەدى. وسىلايشا، كوميتەت جانىبەك اليمحان ۇلىن WBO نۇسقاسى بويىنشا سۋپەر ورتا سالماقتا الەم چەمپيونى اتاعىنا مىندەتتى ۇمىتكەر، دەمەك، قازىرگى WBO الەم چەمپيونى حامزا شيرازدىڭ تيتۋلىنا مىندەتتى ۇمىتكەر ەتىپ تاعايىندايدى»، — دەلىنگەن قۇجاتتا.
سونداي-اق كوميتەت جانىبەك اليمحان ۇلىنىڭ دوپينگ-تەست ناتيجەلەرىنە بايلانىستى ديسكۆاليفيكاسياسى 2026 جىلدىڭ 10 شىلدەسىنەن باستاپ توقتاتىلعانىن، بۇل قازاقستاندىق بوكسشىنىڭ چەمپيوناتقا قاتىسۋ كانديداتۋراسىن قاراۋعا مۇمكىندىك بەرگەنىن حابارلادى. سونىمەن قاتار، ديسكۆاليفيكاسيانىڭ توقتاتىلۋى نەگىزگى تارتىپتىك ءىستى جويمايتىنى جانە بۇزۋشىلىق بولماعانىن بىلدىرمەيتىنى اتاپ ءوتىلدى.
ەسكە سالايىق، 2025 جىلدىڭ 6 جەلتوقسانىندا ءوتۋى ءتيىس ءۇش تيتۋل ءۇشىن جەكپە-جەك الدىندا جانىبەك اليمحان ۇلى دوپينگ داۋىنىڭ ورتاسىندا قالدى. دۇنيەجۇزىلىك بوكس ۇيىمى (WBO) قازاقستاندىق جانىبەك اليمحان ۇلىنىڭ دوپينگ-تەستى وڭ ناتيجە بەرگەنىن رەسمي راستادى. تەرگەۋ باستالدى. كەيىن ۇيىم جانىبەكتى بەلبەۋدەن ايىرماعانىمەن، قازاقستاندىقتى ءبىر جىلعا — 2026 جىلدىڭ جەلتوقسانىنا دەيىن ديسكۆاليفيكاسيالاعانى حابارلانعان بولاتىن. سونىمەن قاتار، بۇعان دەيىن WBO باسشىسى گۋستاۆو وليۆەري The Ring باسىلىمىنا قازاقستاندىق جانىبەك اليمحان ۇلى ورتا سالماقتاعى تيتۋلدان باس تارتىپ، سۋپەر ورتا سالماققا اۋىساتىنىن مالىمدەگەن ەدى.