باتىس قازاقستان وبلىسىندا ءۇش ازامات WhatsApp مەسسەندجەرى ارقىلى الاياقتىق جاساعانى ءۇشىن سوتتالدى. قىلمىسكەرلەر قازاقستاندىقتارمەن حات الماسىپ، وزدەرىن ولاردىڭ تۋىستارى رەتىندە تانىستىرىپ، ءارتۇرلى سىلتاۋلارمەن اقشا اۋدارىمدارىن سۇراپ العان. سحەماعا بەلسەندى تۇردە «دروپپەر» دەپ اتالاتىن ادام قاتىسقان، ونىڭ بانكتىك شوتى ارقىلى شامامەن 5 ميلليون تەڭگە شىعارىلعان. سوتقا دەيىنگى تەرگەۋ بارىسىندا ايىپتالۋشىلاردىڭ ينتەرنەت-الاياقتىقتىڭ 15 ەپيزودىنا قاتىسى انىقتالدى، دەپ حابارلايدى infohub.kz.
باتىس قازاقستان وبلىسى پروكۋراتۋراسىنىڭ مالىمەتىنشە، زارداپ شەككەندەردىڭ اراسىندا باتىس قازاقستان، اقتوبە، الماتى، جامبىل، قىزىلوردا، تۇركىستان وبلىستارىنىڭ، سونداي-اق جەتىسۋ وبلىسى مەن الماتى قالاسىنىڭ تۇرعىندارى بار. سوت ءۇش الاياقتىڭ بارلىعىن كىنالى دەپ تانىدى. بيىلعى جىلدىڭ ماۋسىم ايىندا ولاردىڭ ەكەۋى 3 جىلدان 4 جىل 1 ايعا دەيىن باس بوستاندىعىنان ايىرىلسا، بىرەۋى 3 جىلعا باس بوستاندىعىن شەكتەۋ جازاسىنا كەسىلدى. سونىمەن قاتار، سوت زارداپ شەككەندەردىڭ ازاماتتىق تالاپتارىن تولىق قاناعاتتاندىردى. ۇكىم ءالى زاڭدى كۇشىنە ەنگەن جوق.