قازاقستاننىڭ ساۋدا مينيسترلىگى Wildberries كومپانياسى رەسپۋبليكاعا قوسىمشا قويما الاڭدارىن ورنالاستىرۋ تۋرالى رەسمي ءوتىنىش بەرمەگەنىن مالىمدەدى. الايدا مۇنداي ۇسىنىس تۇسكەن جاعدايدا، ول ەلدىڭ ۇلتتىق مۇددەلەرى مەن زاڭناماسىن ەسكەرە وتىرىپ قارالادى، دەپ حابارلايدى infohub.kz.
بۇعان دەيىن باق-تا Wildberries رەسەيدەگى لوگيستيكالىق ورتالىقتارىنا ۇشقىشسىز ۇشۋ اپپاراتتارى شابۋىل جاساعاننان كەيىن قازاقستاننان قويما الاڭدارىن ىزدەپ جاتقانى تۋرالى اقپارات تارادى. مينيسترلىك بۇگىندە ماركەتپلەيستەن رەسمي ءوتىنىش تۇسپەگەنىن اتاپ ءوتتى.
«مينيسترلىك ءۇشىن حالىقارالىق كومپانيالاردىڭ كەز كەلگەن جوبالارى ءوزارا ءتيىمدى نەگىزدە، ەلدىڭ ۇلتتىق مۇددەلەرىن ەسكەرە وتىرىپ جۇزەگە اسىرىلۋى، وتاندىق كاسىپكەرلەرگە قوسىمشا مۇمكىندىكتەر تۋعىزۋى جانە قازاقستان ەكونوميكاسىنا ينۆەستيسيالارمەن قاتار ءجۇرۋى ماڭىزدى»، – دەدى ۆەدومستۆو وكىلدەرى.
مينيسترلىك قازاقستاننىڭ ترانزيتتىك جانە لوگيستيكالىق الەۋەتى ەلەۋلى ەكەنىن، زاماناۋي قويما ينفراقۇرىلىمىن دامىتۋ، جاڭا جۇمىس ورىندارىن قۇرۋ جانە ترانسشەكارالىق ەلەكتروندى كوممەرسيانى دامىتۋ جونىندەگى ينۆەستيسيالىق جوبالاردى قولدايتىنىن ەسكە سالدى. سونىمەن قاتار بارلىق پروسەسس ق ر زاڭناماسىمەن جانە ەاەو نورمالارىمەن رەتتەلەدى، نارىقتىڭ جەكەلەگەن قاتىسۋشىلارىنا ەرەكشە جاعدايلار جاسالماعان.
18 شىلدەدەن باستاپ Wildberriesء-تىڭ رەسەيدەگى قويمالارىنا ۇشقىشسىز ۇشۋ اپپاراتتارىنىڭ اۋقىمدى شابۋىلدارى جاسالۋدا. سانكت-پەتەربۋرگ، ماسكەۋ وبلىسى، قىرىم، تامبوۆ جانە ۆورونەج وبلىستارى، ستاۆروپول جانە كراسنودار ولكەلەرىندەگى لوگيستيكالىق پاركتەر زارداپ شەكتى. وسىدان كەيىن ماركەتپلەيس قازاقستاننان جالپى اۋدانى 100 مىڭ شارشى مەتر بوس قويما ءۇي-جايلارىن ىزدەي باستادى. الايدا قولايلى نىسان تابۋ وڭاي بولمايدى: NF Group دەرەكتەرى بويىنشا، 2025 جىلدىڭ سوڭىندا ەلدە 1،9 ملن شارشى مەتر ساپالى قويما بولعان، ولاردىڭ تەك 5،8 پايىزى عانا بوس.