گەننادي گولوۆكين باسقاراتىن World Boxing حالىقارالىق فەدەراسياسى رەسمي سايتىندا رەسەيلىك بوكسشىلاردان شەكتەۋلەردى الىپ تاستاعانىن حابارلادى، دەپ حابارلايدى infohub.kz.
ۇيىمنىڭ اتقارۋ كوميتەتى گلازگودا لوس-اندجەلەستەگى 2028 جىلعى وليمپياداعا دايىندىققا قاتىستى كەڭ اۋقىمدى ماسەلەلەردى قاراپ، ءتيىستى شەشىم قابىلدادى.
World Boxing رەسەي وكىلدەرى باسقا ەلدەردىڭ سپورتشىلارىمەن تەڭ دارەجەدە، ياعني ۇلتتىق رامىزدەرمەن (تۋ جانە ءانۇران) ونەر كورسەتە الاتىنىن بەلگىلەدى. سونىمەن قاتار رەسەيلىك دەلەگاسيالاردىڭ مىنەز-قۇلقى مەن دوپينگكە قارسى ەرەجەلەردى ساقتاۋى قاتاڭ باقىلاناتىن بولادى.
سونداي-اق اتقارۋ كوميتەتى استانا قابىلدايتىن 2027 جىلعى الەم چەمپيوناتىنا دايىندىق ماسەلەلەرىن تالقىلاپ، 2028 جىلعى وليمپيادانىڭ ىرىكتەۋ تۋرنيرلەرىنىڭ كۇنتىزبەسىن بەكىتتى.
«بۇگىنگى تالقىلاۋلار مەن شەشىمدەر الەمدىك بوكس فەدەراسياسىنىڭ رينگ ىشىندە دە، سىرتىندا دا قول جەتكىزگەن ەلەۋلى پروگرەسسىن كورسەتتى. وليمپيادالىق ىرىكتەۋدى وتكىزۋ ورىندارىن قامتاماسىز ەتۋدەن باستاپ، باسقارۋ جۇيەسىن نىعايتۋ، جاھاندىق مۇشەلىكتى كەڭەيتۋ جانە كونگرەسكە دايىندىققا دەيىن — ءبىز وليمپيادالىق قوزعالىس اياسىندا بوكستىڭ تابىستى بولاشاعىن قامتاماسىز ەتۋگە دايىن، كۇشتى ءارى اشىق ۇيىم قۇرىپ جاتىرمىز»، — دەدى گولوۆكين.
قازاقستاندىق جانە الەمدىك بوكس لەگەنداسى 2025 جىلدان بەرى World Boxingء-تى باسقارادى.