شىعىس قازاقستان وبلىسىندا زايسان كولىنە قاتىستى جانجال ءورشىدى: دەمالىس ورىندارىندا قوقىستى تىكەلەي قۇمعا كومىپ تاستاعان. بۇل جاعداي الەۋمەتتىك جەلىدەگى شاعىمنان كەيىن جۇرتشىلىقتىڭ نازارىن اۋداردى، دەپ حابارلايدى infohub.kz سايتى.
Zhaneka1408 دەگەن قولدانۋشى Threads الەۋمەتتىك جەلىسىندە كول جاعاسىنداعى بۇزۋشىلىقتار تۋرالى جازبا جاريالادى. ونىڭ ايتۋىنشا، بايتوگاس اۋىلىندا 40-50-گە جۋىق كيىز ءۇي تىگىلگەن، ولاردىڭ يەلەرى قوقىستى شىعارۋمەن اۋرە بولماي، جاي عانا جانىنداعى شۇڭقىرلارعا كومىپ تاستايدى ەكەن. ول يەلەردىڭ ارەكەتتەرىنىڭ زاڭدىلىعىن تەكسەرۋدى تالاپ ەتتى.
شىعىس قازاقستان وبلىسى پوليسيا دەپارتامەنتى بۇل وتىنىشكە جاۋاپ بەردى. قۇقىق قورعاۋ ورگاندارى دەمالىس ايماقتارىنداعى اباتتاندىرۋ ەرەجەلەرىن بۇزۋ مەن ورتاق پايدالانۋ ورىندارىن لاستاۋعا قارسى پروفيلاكتيكالىق جۇمىستار تۇراقتى تۇردە جۇرگىزىلىپ جاتقانىن حابارلادى. جازعى ماۋسىم باستالعالى اتالعان ۋچاسكەدەگى بۇزۋشىلىقتار ءۇشىن التى كيىز ءۇي يەسى اكىمشىلىك جاۋاپكەرشىلىككە تارتىلدى. سونىمەن قاتار، ۋاكىلەتتى ورگاندارعا بۇزۋشىلىقتارعا ىقپال ەتەتىن سەبەپتەر مەن جاعدايلاردى جويۋ تۋرالى نۇسقامالار جىبەرىلدى.
شىعىس قازاقستان وبلىسى اكىمدىگىنىڭ ءباسپاسوز قىزمەتى دە جاعدايعا تۇسىنىكتەمە بەردى. «قازينفورم» ماا دەرەكتەرىنە سايكەس، تەكسەرۋ بارىسىندا اۋماقتىڭ سانيتارلىق جاعدايى باعالانىپ، بۇزۋشىلىقتار انىقتالدى. بىرنەشە ونداعان ادام جاۋاپكەرشىلىككە تارتىلدى. «انىقتالعان بۇزۋشىلىقتار بويىنشا اكىمشىلىك حاتتامالار تولتىرىلدى. 26 ادامعا ەسكەرتۋ جاسالدى، تاعى ۇشەۋى ق ر "اكىمشىلىك قۇقىق بۇزۋشىلىق تۋرالى" كودەكسىنىڭ 505-بابى بويىنشا ايىپپۇل تۇرىندەگى اكىمشىلىك جاۋاپكەرشىلىككە تارتىلدى»، — دەپ حابارلادى وبلىس اكىمدىگىنىڭ ءباسپاسوز قىزمەتى.
سونىمەن قاتار، جاعالاۋدا سانيتارلىق تازالاۋ جۇمىستارى ۇيىمداستىرىلدى. وعان كاسىپكەرلەر مەن جەرگىلىكتى تۇرعىندار جۇمىلدىرىلدى. شۇڭقىرلار تازارتىلىپ، تۇرمىستىق قالدىقتار جينالىپ، شىعارىلدى، اۋماق رەتكە كەلتىرىلدى.