ءبىرىڭعاي جيناقتاۋشى زەينەتاقى قورى (بجزق) ينۆەستيسيالىق پورتفەلىن باسقاراتىن بارلىق جەكە كومپانيالار تامىز ايىنىڭ قورىتىندىسى بويىنشا قازاقستانداعى اعىمداعى ينفلياسيا دەڭگەيىنەن جوعارى تابىستىلىق كورسەتتى، دەپ حابارلايدى infohub.kz سايتى.
قازاقستاندىقتاردىڭ بجزق شوتتارىنداعى قاراجاتى قوزعالىسسىز جاتپايدى — ولار ءتۇرلى قارجى قۇرالدارىنا ينۆەستيسيالانىپ، قوسىمشا تابىس اكەلەدى. تابىستىلىق ءۇشىن قازاقستان رەسپۋبليكاسىنىڭ ۇلتتىق بانكى مەن ينۆەستيسيالىق پورتفەلدى باسقاراتىن التى جەكە كومپانيا جاۋاپتى.
زەينەتاقى اكتيۆتەرىن باسقاراتىن نەگىزگى مەكەمە — ق ر ۇلتتىق بانكى. بجزق دەرەكتەرى بويىنشا، 1 قىركۇيەكتە ونىڭ باسقارۋىندا مىندەتتى جانە ەرىكتى زەينەتاقى جارنالارى ەسەبىنەن قۇرىلعان شامامەن 26،95 ترلن تەڭگە بولدى. جىل باسىنان بەرگى تابىستىلىق 4،2%-دى، ال جىلدىق — 6،17%-دى قۇرادى.
سونىمەن قاتار، ۇلتتىق بانك جۇمىس بەرۋشىنىڭ مىندەتتى زەينەتاقى جارناسى (جمزج) ەسەبىنەن قالىپتاساتىن جيناقتاردى باسقارادى. شوتتارداعى قاراجاتتىڭ جالپى سوماسى 1،35 ترلن تەڭگەگە جەتتى. جىل باسىنان بەرگى تابىستىلىق 11،78%-دى، ال جىلدىق — 18،65%-دى قۇرادى. بۇل ەلدەگى جىلدىق ينفلياسيادان (9،8%) ايتارلىقتاي جوعارى.
جەكە كومپانيالاردىڭ باسقارۋىندا 151،2 ملرد تەڭگەدەن استام قاراجات بار. 1 قىركۇيەكتەگى جاعداي بويىنشا ولار مىناداي ناتيجەلەر كورسەتتى:
Alatau City Invest — باسقارۋىندا 24،1 ملرد تەڭگە. جىل باسىنان بەرگى تابىستىلىق 8،25%، ال جىلدىق — 13،91%؛
Halyk Finance — 77،6 ملرد تەڭگە اكتيۆتى باسقارادى. جىل باسىنان بەرگى تابىستىلىق 9،06%، ال جىلدىق — 11،82%؛
«سەنتراس سەكيۋريتيز» — 22،6 ملرد تەڭگەنى باسقارادى. جىل باسىنان بەرگى تابىستىلىق 12،18%، ال جىلدىق — 17،05%؛
Halyk Global Markets — پورتفەلىندە 6،6 ملرد تەڭگە اكتيۆ بار. جىل باسىنان بەرگى تابىستىلىق 7،55%، ال جىلدىق — 11،3%؛
BCC Invest — 19،6 ملرد تەڭگە اكتيۆتى باسقارادى. جىل باسىنان بەرگى تابىستىلىق 8،09%، ال جىلدىق — 10،95%؛
Tansar Capital — 743،7 ملن تەڭگە اكتيۆتى باسقارادى. بۇل كومپانيا 2026 جىلدىڭ 8 ساۋىرىنەن باستاپ جۇمىس ىستەيدى جانە وسى ۋاقىت ىشىندە 2،43% تابىستىلىق اكەلدى.
وسىلايشا، ۇلتتىق بانكتەگى نەگىزگى جيناقتار ەڭ از تابىس اكەلدى، ال جۇمىس بەرۋشىلەردىڭ جارنالارى ەسەبىنەن قاراجات ەڭ كوپ ءوستى. سونىمەن بىرگە بارلىق جەكە باسقارۋشى كومپانيالار ءساتتى جۇمىس ىستەپ، ينفلياسيادان اسىپ ءتۇستى.
ەسكە سالايىق، 7 قىركۇيەكتەن باستاپ قازاقستاندىقتار ءوز جيناقتارىنىڭ 100%-ىن جەكە كومپانيالاردىڭ باسقارۋىنا بەرۋ مۇمكىندىگىنە يە بولدى. مۇنى ىستەۋ نەمەسە ىستەمەۋ — اركىمنىڭ جەكە ءىسى، مىندەتى ەمەس. ازاماتتار اقشانى كىمگە جانە قانشا اۋداراتىنىن، ءتىپتى مۇنى ىستەۋ كەرەك پە، جوق پا — وزدەرى شەشە الادى.
ال جيناقتاردى جبك-دان ۇلتتىق بانكتىڭ باسقارۋىنا قايتارۋعا بولا ما، جوق پا — ول تۋرالى ءبىز وسىندا جازعان بولاتىنبىز.