جامبىل وبلىستىق سوتىنىڭ قىلمىستىق ىستەر جونىندەگى سوت القاسى وبلىستىق پوليسيا دەپارتامەنتىنىڭ بۇرىنعى باسشىسىنىڭ ورىنباسارى جايداربەك كۇتتىباەۆقا قاتىستى ۇكىمدى قايتا قاراپ، باس بوستاندىعىنان ايىرۋ مەرزىمىن التى جىلدان ءتورت جىلعا قىسقارتتى، دەپ حابارلايدى infohub.kz سايتى.
«قازينفورم» ميا-نىڭ حابارلاۋىنشا، القا سونداي-اق وسى ءىس بويىنشا ايىپتالۋشى بولعان تالاس اۋدانى پوليسيا ءبولىمىنىڭ بۇرىنعى ۋاقىتشا باسشىسى ەركەن اباەۆقا بەرىلگەن جازانى جەڭىلدەتكەن: بەس جىلدىڭ ورنىنا وعان ءتورت جىل باس بوستاندىعىنان ايىرۋ تاعايىندالعان.
ءىس بويىنشا زارداپ شەككەن ادام — ينسپەكتور دارحان ۋالييەۆ. ايىپتاۋ نۇسقاسى بويىنشا، ۋالييەۆ باسقا قىلمىستىق قۋدالاۋدىڭ سۋبەكتىسى بولعان: وعان ادامدى سوققىعا جىقتى دەگەن ايىپپەن قىلمىستىق ءىس قوزعاۋ جانە ىشكى ىستەر ورگاندارىنان جۇمىستان شىعارۋ ءقاۋپى تونگەن.
سول كەزدە تالاس اۋدانى پوليسيا ءبولىمىنىڭ ۋاقىتشا باسشىسى قىزمەتىن اتقارعان ەركەن ابايەۆ ءوز قاراماعىنداعى قىزمەتكەرگە ماسەلەنى وبلىستىق پوليسيا دەپارتامەنتى باسشىسىنىڭ ورىنباسارى جايداربەك كۇتتىبايەۆ ارقىلى شەشۋدى ۇسىنعان. ءىس ماتەريالدارىنا سايكەس، 5 ميلليون تەڭگە ءۇشىن ۋاليەۆكە اتاعىن ساقتاپ قالۋعا جانە قىلمىستىق جاۋاپكەرشىلىكتەن قۇتىلۋعا كومەكتەسۋگە ۋادە بەرىلگەن. الايدا پوليسەي قاماۋعا الىنىپ، اقشانى بەرگەنى تۋرالى قۇقىق قورعاۋ ورگاندارىنا حابارلاعان.
ەسكە سالايىق، 18 ماۋسىمدا جامبىل وبلىسى پوليسيا دەپارتامەنتىنىڭ بۇرىنعى باسشىسىنىڭ ورىنباسارى مەن تالاس اۋدانى پوليسيا ءبولىمىنىڭ بۇرىنعى باسشىسى پارا ءىسى بويىنشا سوتتالعان. سوندا جايداربەك كۇتتىبايەۆ التى جىل، ال ەركەن ابايەۆ بەس جىل باس بوستاندىعىنان ايىرىلعان. بۇدان باسقا، ەكەۋىنە دە ءومىر بويى مەملەكەتتىك قىزمەتتە جانە قۇقىق قورعاۋ ورگاندارىندا جۇمىس ىستەۋگە تىيىم سالىنىپ، ارنايى اتاقتارىنان ايىرىلعان.