جامبىل وبلىسىندا ەر ادام قايتىس بولعان اناسىنىڭ ۇلتىن سوت ارقىلى قالپىنا كەلتىردى. سوت «ازاماتتارعا ارنالعان ۇكىمەت» مەملەكەتتىك كورپوراسياسىن ءتيىستى وزگەرىستەر ەنگىزۋگە مىندەتتەدى، دەپ حابارلايدى infohub.kz سايتى.
جامبىل وبلىسى سوتتارىنىڭ رەسمي Telegram-ارناسىندا حابارلانعانداي، مامانداندىرىلعان اۋدانارالىق اكىمشىلىك سوت ازاماتتىڭ «ازاماتتارعا ارنالعان ۇكىمەت» مەملەكەتتىك كورپوراسياسىنا اناسىنىڭ ۇلتى بولىگىندە تۋۋ تۋرالى اكت جازباسىنا وزگەرىستەر ەنگىزۋ تۋرالى تالاپ ارىزى بويىنشا ءىستى قارادى.
تالاپكەر تۋىلعان كەزدە اكت جازباسىندا ونىڭ اناسىنىڭ ۇلتى «ورىس» دەپ كورسەتىلگەن. الايدا سوت زەرتتەگەن قۇجاتتار تالاپكەردىڭ اناسىنىڭ اتا-اناسى ۇلتى بويىنشا چەحوسلوۆاك پەن نەمىس بولعانىن راستادى. دەمەك، «نەكە (ەرلى-زايىپتىلىق) جانە وتباسى تۋرالى» كودەكستىڭ تالاپتارىنا سايكەس، اناسىنىڭ تۋعان كەزدەگى ۇلتى «چەح» نەمەسە «نەمىس» دەپ كورسەتىلۋى ءتيىس ەدى.
بۇعان دەيىن مەملەكەتتىك كورپوراسيا ءتيىستى وزگەرىستەر ەنگىزۋدەن باس تارتقان بولاتىن. اناسى قايتىس بولعاننان كەيىن ونىڭ جەكە دەرەكتەرىنە وزگەرىستەر ەنگىزۋ زاڭنامادا كوزدەلمەگەن، بۇل تالاپكەردىڭ ءوز ۇلتى تۋرالى مالىمەتتەردى وزگەرتۋ مۇمكىندىگىنەن ءىس جۇزىندە ايىرعان.
بۇزىلعان قۇقىقتى قورعاۋدىڭ وزگە ءتاسىلىنىڭ بولماۋىن، سونداي-اق ادىلدىك پەن پاراساتتىلىق قاعيداتتارىن باسشىلىققا الا وتىرىپ، سوت تالاپ ارىزدى قاناعاتتاندىردى.
سوت شەشىمىمەن جاۋاپكەرگە تالاپكەردىڭ تۋۋ تۋرالى اكت جازباسىنا تۇزەتۋلەر ەنگىزۋ، اناسىنىڭ ۇلتىن «ورىس» دەگەننەن «چەح» دەپ وزگەرتۋ مىندەتى جۇكتەلدى.
سونداي-اق سوت شەشىم ءبىر اي مەرزىمدە ورىندالماعان جاعدايدا جاۋاپكەردەن 50 اەك مولشەرىندە اقشالاي ءوندىرىپ الۋعا اكەپ سوعاتىنىن كورسەتتى.
شەشىم زاڭدى كۇشىنە ەنگەن جوق.