جامبىل وبلىسىندا قازا تاپقان 25 جاستاعى سپورتشى احمەت دۋكەنبايدىڭ تۋىستارى مەملەكەتتىك قورعاۋ بەرۋدى ءوتىندى. ولار ءوز قاۋىپسىزدىكتەرىنە الاڭداپ، قىلمىسقا باسقا ادامداردىڭ قاتىسى بولۋى مۇمكىن ەكەنىن تەكسەرۋدى تالاپ ەتىپ وتىر، دەپ حابارلايدى infohub.kz سايتى.
قايتىس بولعان سپورتشىنىڭ اپكەسى زارينا دۋكەنباەۆانىڭ ايتۋىنشا، 1 تامىزعا قاراعان ءتۇنى ۇيلەرىنىڭ جانىنان تورت-بەس وق اتىلعان. شامامەن ءبىر ساعاتتان كەيىن پوليسيا قىزمەتكەرلەرى وتباسىنا احمەت دۋكەنبايدىڭ اۋىر حالدە اۋرۋحاناعا جەتكىزىلگەنىن حابارلاعان. كەيىن ول كوز جۇمعان.
مارقۇمنىڭ جۇبايى التىناي بورانبايدىڭ ايتۋىنشا، قاستاندىقتان ءسال بۇرىن كۇيەۋى ونى بەيتانىس ادامدارمەن جانجال بولعانىن ەسكەرتكەن. ول بالالاردى مۇقيات قاداعالاپ، الىسقا جىبەرمەۋدى جانە ساق بولۋدى وتىنگەن.
سپورتشىنىڭ اكەسى سەرىك دۋكەنباي ۇلى تۋىستارىنىڭ ومىرىنە ءقاۋىپ ءتونىپ تۇرعانىن ايتىپ، وتباسىنا مەملەكەتتىك قارۋلى كۇزەت بەرۋدى تالاپ ەتكەن.
بۇعان دەيىن ەر ادامنىڭ ءتۇرار رىسقۇلوۆ اۋدانىنىڭ لۋگوۆوە اۋىلىندا تۇنگى ساعات ءۇش شاماسىندا اتىلىپ ولتىرىلگەنى حابارلانعان بولاتىن. تۋىستارى وعان ءقاۋىپ تونگەنىن ايتىپ، جەرگىلىكتى قىلمىستىق توپتىڭ قاتىسى بولۋى مۇمكىن ەكەنىن جەتكىزگەن. اتالعان وقيعا بويىنشا پوليسيا سوتقا دەيىنگى تەرگەۋدى باستاپ، كۇدىكتى ۇستالىپ، ۋاقىتشا ۇستاۋ يزولياتورىنا قامالعان.