ماڭعىستاۋ وبلىسىنداعى جاڭاوزەندە ساعاتىنا 280 توننا ءونىم شىعاراتىن اسفالتبەتون زاۋىتىن سالۋ جوباسى اياقتالۋعا جاقىن. قۇرىلىس جۇمىستارىن 2026 جىلى ءبىتىرۋ جوسپارلانسا، كاسىپورىندى تولىق ىسكە قوسۋ 2027 جىلعا بەلگىلەنگەن. بۇل تۋرالى جوبانى باستاۋشى «اسك گرۋپپ اكتاۋ» كومپانياسىنىڭ جوسپارلانعان قىزمەتى تۋرالى مالىمدەمەسىندە ايتىلعان، دەپ حابارلايدى infohub.kz سايتى.
«تولىق زاۋىتتىق دايىندىقتاعى، ساعاتىنا 280 توننا ءونىم شىعاراتىن اسفالت قوسپاسىن دايىندايتىن قوندىرعى سالۋ قاراستىرىلۋدا. 1 دانا كولەمىندەگى دس-168637 اسفالت قوسپاسىن دايىندايتىن قوندىرعى جول جانە باسقا دا قۇرىلىس تۇرلەرىندە قولدانىلاتىن اسفالتبەتون قوسپالارىن ازىرلەۋگە ارنالعان»، – دەلىنگەن ماڭعىستاۋ وبلىسى بويىنشا ەكولوگيا دەپارتامەنتىنىڭ مامىر ايىندا كومپانيا ۇسىنعان قۇجاتتى قاراۋ قورىتىندىسىندا.
زاۋىت جاڭاوزەن قالاسىنىڭ سۋبايماعىندا 2،5 گا اۋماقتا سالىنىپ جاتىر. كومپانيا مالىمەتىنشە، نىساننان تۇرعىن ايماققا دەيىنگى قاشىقتىق 5 كم-دەن اسادى. اسفالتبەتون زاۋىتىنىڭ قۇرىلىسى التى ايعا سوزىلادى. كاسىپورىندى پايدالانۋ 2027 جىلدان باستالسا، ونى جويۋ 2050 جىلى جوسپارلانعان.
كاسىپورىن قوسپا رەسەپتۋراسىن جەدەل وزگەرتىپ، تەحنولوگيالىق وپەراسيالاردىڭ تولىق سيكلىن جۇرگىزۋگە مۇمكىندىك بەرەدى: ءىرى كەسەك شيكىزاتتى (قيىرشىق تاس، قۇم جانە ەلەكتەن وتكەن قالدىق) العاشقى ەلەۋدەن باستاپ، گازداردى قاپشىق سۇزگىلەرمەن مۇقيات تازارتۋعا دەيىن. قىزدىرىلعان ماتەريالدار 5–6 فراكسياعا سۇرىپتالىپ، ىستىق بۋنكەردە ۋاقىتشا ساقتالادى، ولشەنىپ، ارالاستىرعىشقا جىبەرىلەدى.
زاۋىتتى ىسكە قوسۋ ەنەرگيا رەسۋرستارىنا قوسىمشا جۇكتەمە تۇسىرەدى. اتاپ ايتقاندا، كەپتىرۋ بارابانىنىڭ قوزعالتقىشىنىڭ قۋاتى 45 كۆت، بيتۋم بۋنكەرىنىڭ ارالاستىرعىشى – 55 كۆت، ەلەۆاتور – 15 كۆت، تاسپالى كونۆەيەر – 5،5 كۆت بولادى. ابز وتتىعىنداعى گاز شىعىنى ءونىمنىڭ ءبىر تونناسىنا 12 تەكشە مەتردى قۇرايدى.
اقتاۋ تەڭىز پورتى «اسك گرۋپپ اكتاۋ» اسفالتبەتون زاۋىتى ارنايى ەكونوميكالىق ايماقتىڭ №14 قالا ماڭىندا ورنالاساتىنىن حابارلاعان. كومپانياعا جوبانى جۇزەگە اسىرۋ ءۇشىن 5 گا جەر بەرىلگەن. جوباعا سالىناتىن ينۆەستيسيا كولەمى 300 ملن تەڭگەنى قۇرايدى. ىسكە قوسىلعان سوڭ زاۋىتتا 15 ادام جۇمىس ىستەيدى.
زاۋىت جول ماتەريالدارىن ءوندىرۋ ءۇشىن بيتۋم پايدالانادى. وڭىردەگى جانە جالپى قازاقستانداعى ەڭ ءىرى بيتۋم ءوندىرۋشىسى – «قازمۇنايگازعا» (50%) جانە قىتايلىق CITIC Group-قا (50%) تيەسىلى اقتاۋلىق Kaspi Bitum بىرلەسكەن كاسىپورنى. 2025 جىلى Kaspi Bitum بىرلەسكەن كاسىپورنى قاراجانباس كەن ورنىنىڭ مۇنايىمەن جۇمىس ىستەيتىن بيتۋم زاۋىتىن جاڭعىرتۋدى اياقتاپ، قۋاتىن جىلىنا 1،5 ملن توننا مۇنايعا نەمەسە 750 مىڭ توننا بيتۋمعا دەيىن ۇلعايتتى (بۇرىن تيىسىنشە 1 ملن توننا جانە 500 مىڭ توننا بولاتىن).
اقتاۋدا تىركەلگەن «اسك گرۋپپ اكتاۋ» كومپانياسىنىڭ جالعىز يەسى – اقەركە قاراعۇلوۆا. ونىڭ اقتاۋدا «ساۋلەم» جەكە كاسىپكەرلىگى دە بار. مەملەكەتتىك كىرىستەر كوميتەتىنىڭ دەرەگىنشە، «اسك گرۋپپ اكتاۋ» 2026 جىلى 6،2 ملن تەڭگە سالىق تولەگەن (2024–2025 جىلدارى سالىق تولەمەگەن).