قازاقستاندىق بوكسشى جانىبەك ءالىمحان ۇلى WBO نۇسقاسى بويىنشا ەكىنشى ورتا سالماقتاعى الەم چەمپيونى بريتاندىق حامزا شيرازدىڭ ولاردىڭ اراسىنداعى ىقتيمال جەكپە-جەك تۋرالى پىكىرىنە جاۋاپ بەردى، دەپ حابارلايدى infohub.kz.
بۇعان دەيىن دۇنيەجۇزىلىك بوكس ۇيىمى (WBO) شيرازدى ءالىمحان ۇلىعا قارسى اتاعىن قورعاۋعا مىندەتتەگەن ەدى. قازاقستاندىق ۇيىم رەيتينگىندە ەكىنشى ورىندا تۇر. بريتانيالىق بۇل شەشىمدى سىنعا الىپ، قازاقستاندىققا قاتىستى دوپينگ وقيعاسىن ەسكە سالدى.
ءالىمحان ۇلى ءوز كەزەگىندە قازىرگى چەمپيوندى جەكپە-جەككە كەلىسىپ، رينگتە ءوز باسىمدىعىن دالەلدەۋگە شاقىردى.
«نەگە ول جاي عانا: "كانە، توبەلەسەيىك!" دەمەيدى؟ بۇل — سپورت! ەگەر ءوزىڭدى چەمپيونمىن دەپ اتاساڭ، سونى دالەلدە. شىعىپ، ۇزدىكتەرمەن شايقاس، بارىنە شىنايى كىم ەكەنىڭدى كورسەت. پودكاستتا وتىرىپ، جىلاپ-ەڭىرەپ جۇرمە — رينگكە شىعىپ، توبەلەس!» — دەپ جازدى ءالىمحان ۇلى الەۋمەتتىك جەلىدەگى X پاراقشاسىندا.
ەسكە سالايىق، وتكەن جىلدىڭ جەلتوقسانىندا قازاقستاندىق بوكسشى مەلدونيگە وڭ ناتيجە بەرگەننەن كەيىن ءبىر جىلعا ديسكۆاليفيكاسيالانعان ەدى. الايدا بيىل جازدا ءىس قايتا قارالىپ، WBO ءالىمحان ۇلىنىڭ ديسكۆاليفيكاسياسىن مەرزىمىنەن بۇرىن توقتاتۋ تۋرالى شەشىم قابىلدادى.
ەندى قازاقستاندىق WBO نۇسقاسى بويىنشا ەكىنشى ورتا سالماقتاعى تيتۋلعا رەسمي ۇمىتكەر بولىپ تابىلادى.