ارنايى سالىق رەجيمى بويىنشا جەڭىلدەتىلگەن دەكلاراسيا نەگىزىندە جۇمىس ىستەيتىن كاسىپكەرلىك سۋبەكتىلەرى اعىمداعى جىلدىڭ ءبىرىنشى جارتىجىلدىعىنىڭ قورىتىندىسى بويىنشا تابىسىن 9،4 ترلن تەڭگەگە دەيىن ۇلعايتتى. قارجى مينيسترلىگىنىڭ حابارلاۋىنشا، بۇل وتكەن جىلدىڭ سايكەس كەزەڭىمەن سالىستىرعاندا 18،9%-عا كوپ — ول كەزدە كورسەتكىش 7،9 ترلن تەڭگە بولاتىن، دەپ حابارلايدى infohub.kz سايتى.
«اعىمداعى جىلدىڭ ءبىرىنشى جارتىجىلدىعىنىڭ قورىتىندىسى بويىنشا وسى رەجيمدى قولداناتىن بيزنەستىڭ تابىسى 9،4 ترلن تەڭگەنى قۇرادى. وتكەن جىلدىڭ سايكەس كەزەڭىمەن سالىستىرعاندا ولار 18،9%-عا ءوسىپ، 7،9 ترلن تەڭگەدەن استى»، – دەلىنگەن جاريالانعان حابارلامادا.
2026 جىلدىڭ قاڭتارىنان باستاپ جاڭا سالىق كودەكسى كۇشىنە ەنىپ، ونىڭ اياسىندا ارنايى سالىق رەجيمدەرى وڭتايلاندىرىلدى. ولاردىڭ ىشىندە ەڭ سۇرانىسقا يەسى — جەڭىلدەتىلگەن دەكلاراسيا نەگىزىندەگى ارنايى سالىق رەجيمى. ونى قولدانۋدىڭ العاشقى قورىتىندىلارى كاسىپكەرلەر قىزمەتىنىڭ نەگىزگى كورسەتكىشتەرىندە وڭ ديناميكا بايقالىپ وتىرعانىن كورسەتەدى، دەپ اتاپ ءوتتى قارجى مينيسترلىگىندە.
جەڭىلدەتىلگەن ارنايى سالىق رەجيمىن قولداناتىن كاسىپكەرلەردىڭ جۇمىسپەن قامتۋ كورسەتكىشتەرى دە وڭ ديناميكا كورسەتىپ وتىر. اتاپ ايتقاندا، جالدامالى قىزمەتكەرلەر سانى 14،2%-عا ارتىپ، 445 مىڭنان 509 مىڭ ادامعا جەتتى، ال ەڭبەكاقى تولەۋ قورى 7،2%-عا ءوستى.
سونىمەن قاتار ۆەدومستۆونىڭ مالىمەتىنشە، جالدامالى قىزمەتكەرى جوق بيزنەس سۋبەكتىلەرىنىڭ سانى 30،5%-عا قىسقاردى. دەكلاراسيالارىندا نولدەن 5 ملن تەڭگەگە دەيىنگى تابىستى كورسەتكەن كاسىپكەرلەردىڭ سانى دا ۇشتەن بىرگە جۋىق ازايدى.
جەڭىلدەتىلگەن دەكلاراسيا نەگىزىندەگى ارنايى سالىق رەجيمىن سالىق كودەكسىندە بەلگىلەنگەن تالاپتارعا ساي كەلەتىن، جىلدىق تابىسى 600 مىڭ ايلىق ەسەپتىك كورسەتكىشكە دەيىنگى جەكە كاسىپكەرلەر مەن زاڭدى تۇلعالار قولدانا الادى. 2026 جىلعا ارنالعان ايلىق ەسەپتىك كورسەتكىش 4325 تەڭگەنى قۇرايدى، ياعني 600 اەك – 2،595 ملرد تەڭگە.
جەڭىلدەتىلگەن ارنايى سالىق رەجيمى بويىنشا جەكە نەمەسە كورپوراتيۆتىك تابىس سالىعىنىڭ مولشەرلەمەسى 4%-دى قۇرايدى. بۇل رەتتە جەرگىلىكتى وكىلدى ورگاندار (ءماسليحاتتار) ونىڭ مولشەرىن 50%-عا ازايتۋعا نەمەسە ۇلعايتۋعا قۇقىلى، ياعني ناقتى سالىق مولشەرلەمەسى تابىستىڭ 2%-دان 6%-عا دەيىنگى ارالىعىندا بولۋى مۇمكىن.
وسى رەجيمدى قولداناتىن كاسىپكەرلەر الەۋمەتتىك سالىق پەن قوسىلعان قۇن سالىعىن تولەۋشىلەر بولىپ سانالمايدى، يمپورتتالاتىن تاۋارلارعا قوسىلعان قۇن سالىعى مەن رەزيدەنت ەمەس ءۇشىن قوسىلعان قۇن سالىعى بۇعان جاتپايدى.