بايرويت ۋنيۆەرسيتەتىنىڭ جانىنداعى باۆاريا ەكسپەريمەنتالدىق گەوحيميا جانە گەوفيزيكا عىلىمي-زەرتتەۋ ينستيتۋتىنىڭ عالىمدارى باستاعان حالىقارالىق زەرتتەۋشىلەر توبى پلانەتا بەتىنەن 2900 شاقىرىم تەرەڭدىكتە جەر قالىپتاسقان كەزدەن ساقتالعان كونە سۋ قورى بولۋى مۇمكىن ەكەنىن انىقتادى، دەپ حابارلايدى infohub.kz سايتى.
بۇل بولجامدى تەكسەرۋ ءۇشىن ماماندار زەرتحانادا تومەنگى مانتيانىڭ ەكسترەمالدى جاعدايىن جاسادى. الماز بالعالار مەن لازەرلەردىڭ كومەگىمەن ۇلگىلەردى اتموسفەرالىق قىسىمنان ەكى ميلليون ەسە اساتىن قىسىممەن سىعىپ، 2500 گرادۋس سەلسيگە دەيىن قىزدىردى.
تاجىريبە بارىسىندا بۇرىن بەلگىسىز بولعان ەكى تەمىر وكسيگيدروكسيدى ءتۇزىلدى. جۇمىس اۆتورلارىنىڭ پىكىرىنشە، ءدال وسى قوسىلىستار مانتيا مەن يادرو شەكاراسىندا سۋدى ۇستاپ تۇرۋعا قابىلەتتى.
تالداۋ كورسەتكەندەي، تىعىز مينەرالدىق قوسىلىستار سۋتەگى از مولشەردە بولعاننىڭ وزىندە دە تۇزىلە الادى. زەرتتەۋ اۆتورلارىنىڭ ءبىرى لەونيد دۋبروۆينسكيدىڭ ايتۋىنشا، بۇل مينەرالدار باستاپقى سۋدى دا، تەكتونيكالىق پليتالاردىڭ قوزعالىسىمەن تەرەڭگە تارتىلاتىن ىلعالدى دا ۇزاق ۋاقىت ۇستاپ تۇرۋعا ءمىنسىز ۇمىتكەر بولىپ سانالادى.
جۇمىس ناتيجەلەرى Nature Geoscience جۋرنالىندا جاريالاندى. ولار سۋ اينالىمىن جانە جەردىڭ ىشكى قۇرىلىمىنىڭ ەۆوليۋسياسىن جاقسىراق تۇسىنۋگە كومەكتەسەدى. تاجىريبە زەرتحانادا وتكەنىمەن، ول پلانەتانىڭ كونە سۋ قورلارىن قايدا جاسىراتىنى تۋرالى ماڭىزدى دەرەكتەر بەرەدى.