جەردەگى تاۋلىك ۇزاقتىعى وزگەرمەيتىن سياقتى كورىنەدى: شىن مانىندە پلانەتانىڭ اينالۋ جىلدامدىعى ءسال اۋىتقىپ وتىرادى، سول سەبەپتى كۇندەر كەيدە ءسال ۇزارىپ، كەيدە ءسال قىسقارادى. ScienceDaily جازۋىنشا، جەر قويناۋىنىڭ اينالۋ جىلدامدىعىنىڭ وزگەرۋى تاۋلىك ۇزاقتىعىنا اسەر ەتىپ، ونى ءار ونجىلدىقتا بىرنەشە ميلليسەكۋندقا وزگەرتىپ وتىرادى، دەپ حابارلايدى infohub.kz سايتى.
عالىمدار پلانەتانىڭ سۇيىق يادروسى كەيدە جىلدامداپ، كەيدە باياۋلايتىنىن الدەقاشان بايقاعان. قالىڭدىعى شامامەن 3000 شاقىرىم تاستى قابىق — مانتيا — بۇعان كەرىسىنشە ارەكەت ەتىپ، پلانەتانىڭ جالپى يمپۋلس مومەنتىن ساقتايدى.
البەرتا ۋنيۆەرسيتەتىنىڭ فيزيكتەرى جاڭا زەرتتەۋدە وسى ءوزارا ارەكەتتەستىكتىڭ مەحانيزمىن ءتۇسىندىردى. قاتتى ىشكى يادرونىڭ اينالۋ جىلدامدىعىنىڭ وزگەرۋى گراۆيتاسيالىق مومەنت تۋدىرادى. ىشكى يادرو ءمىنسىز شار ءتارىزدى بولماعاندىقتان، ونىڭ قوزعالىسى مانتيانىڭ بىرتەكتى ەمەس ماسسالارىنا گراۆيتاسيالىق اسەر ەتىپ، ونى يتەرىپ نەمەسە تەجەپ وتىرادى.
بۇل كۇشكە يادرو مەن مانتيا شەكاراسىنداعى ۇيكەلىس پەن ەلەكتروماگنيتتىك كەدەرگى قارسى تۇرادى. ءدال وسى پروسەستەردىڭ تەڭدىگى كۇن ۇزاقتىعىنىڭ قانشالىقتى وزگەرەتىنىن انىقتايدى. سونىمەن قاتار جۇمىس اۆتورلارى ىشكى يادرو جۇكتەمەلەر اسەرىنەن ءپىشىنىن وزگەرتە الاتىنىن، سىرتقى كۇشتەرگە بۇرىن ويلاعاننان الدەقايدا سەرپىندى جاۋاپ بەرەتىنىن انىقتادى.