جەتىسۋ وبلىسىنىڭ اقسۋ اۋدانىندا جەرگىلىكتى ساتۋشىلار اراسىنداعى تۇرمىستىق جانجال توبەلەسكە ۇلاسىپ، ناتيجەسىندە ءبىر ايەل اۋرۋحاناعا جات قىزىلدى. وقيعا پوليسيا قىزمەتكەرىنىڭ كوز الدىندا بولعان، ال وقيعانىڭ ۆيدەوسىن «كريمينالنىي كازاحستان» Telegram-ارناسى تاراتقان... دەپ حابارلايدى infohub.kz سايتى.
كادرلاردا جانجالعا قاتىسۋشىلاردىڭ ءبىرى جەردە جاتقان ايەلگە جاقىنداپ، ونىڭ بەتىنە اياعىمەن تەپكىلەگەنى كورىنەدى. سول ساتتە قاسىندا پوليسيا قىزمەتكەرى تۇر.
جەرگىلىكتى تۇرعىنداردىڭ ايتۋىنشا، جانجالدىڭ سەبەبى ساتىپ الۋشىلار ءۇشىن باسەكەلەستىك بولۋى مۇمكىن. ساتۋشىلاردىڭ ءبىر بولىگى ارنايى جابدىقتالعان بازارعا اۋىستىرىلعاننان كەيىن جاعداي ۋشىققان.
ناتيجەسىندە ايەلدەردىڭ ءبىرى جاراقات الىپ، اۋرۋحاناعا جەتكىزىلدى.
جەتىسۋ وبلىسى پوليسيا دەپارتامەنتىنىڭ مالىمەتىنشە، ۇرىپ-سوعۋ فاكتىسى بويىنشا قىلمىستىق ءىس قوزعالدى. وقيعاعا قاتىسۋشىلاردىڭ بارلىعى انىقتالىپ، اۋداندىق پوليسيا بولىمىنە جەتكىزىلدى.
الدىن الا دەرەكتەر بويىنشا، كۇدىكتى مەن جابىرلەنۋشى بۇرىن تانىس بولعان.
«قازىرگى ۋاقىتتا وقيعانىڭ بارلىق ءمان-جايىن انىقتاۋعا جانە جانجالعا قاتىسۋشىلاردىڭ ارەكەتتەرىنە قۇقىقتىق باعا بەرۋگە باعىتتالعان قاجەتتى تەرگەۋ ارەكەتتەرى جۇرگىزىلۋدە»، — دەپ حابارلادى وبلىستىق پوليسيا دەپارتامەنتى.
تەرگەۋ قورىتىندىسى بويىنشا زاڭناماعا سايكەس پروسەسسۋالدىق شەشىم قابىلدانادى.
بۇعان دەيىن «كۋرسيۆ» اقتوبە وبلىسىندا 26 جاستاعى ەر ادام تويعا قوناق رەتىندە بارىپ، توبەلەستەن كەيىن قايتىس بولعانىن جازعان. وقيعا بويىنشا قىلمىستىق ءىس قوزعالىپ، كۇدىكتى ۇستالىپ، ۋاقىتشا ۇستاۋ يزولياتورىنا قامالعان.