جەتىسۋ وبلىسىنداعى رەسپۋبليكالىق ماڭىزداعى سارىوزەك — كوكتال تاس جولىنىڭ بولىگىندە اۋىر جۇك كولىكتەرى اۆتوماتتاندىرىلعان ولشەۋ ستانسياسىن اينالىپ ءوتىپ جۇرگەن، الايدا جۇرگىزۋشىلەرگە ارنالعان بۇل ولقىلىق جابىلدى، دەپ حابارلايدى infohub.kz سايتى.
باس كولىك پروكۋراتۋراسىنىڭ رەسمي سايتىندا حابارلانعانداي، اتالعان ۋچاسكەدە اۋىر سالماقتى كولىكتەردىڭ اۆتوماتتاندىرىلعان ولشەۋ ستانسياسىن اينالىپ ءوتۋ فاكتىلەرى انىقتالعان.
«اينالىپ ءوتۋ ءۇشىن جەكە كاسىپورىن وندىرىستىك قاجەتتىلىككە سالعان تەحنيكالىق جول پايدالانىلدى»، — دەدى باس كولىك پروكۋراتۋراسىندا.
ۆەدومستۆونىڭ ۇيلەستىرۋىمەن «قازاۆتوجول» فيليالى ارنايى تەحنيكا تارتىپ، اينالما جولداردى فيزيكالىق تۇرعىدان جاپتى.
قازىرگى تاڭدا جۇك كولىكتەرىنىڭ قوزعالىسى اۆتوماتتاندىرىلعان ستاسيونارلىق كەشەن ارقىلى جۇزەگە اسىرىلۋدا.
پروكۋراتۋرا، كولىك باقىلاۋ ينسپەكسياسى جانە اكىمشىلىك پوليسيا قىزمەتكەرلەرىنەن تۇراتىن ۆەدومستۆوارالىق جۇمىس توبى قۇرىلدى. توپتىڭ جۇمىسى ايماقارالىق قاعيدات بويىنشا جۇرگىزىلەدى.
ءموبيلدى سالماق ولشەۋ كەشەندەرىنىڭ سانىن كوبەيتۋ تۋرالى شەشىم قابىلداندى.
«„قازاۆتوجول“ ۇك» اق-مەن بىرلەسىپ، قونايەۆ قالاسىنا كىرەبەرىستە اۆتوماتتاندىرىلعان جۇيە ورناتۋ ماسەلەسىن پىسىقتاپ جاتىرمىز، بۇل شارالار سالماق پارامەترلەرىن باقىلاۋدىڭ تيىمدىلىگىن بىرنەشە ەسە ارتتىرادى»، — دەپ اتاپ ءوتتى باس كولىك پروكۋراتۋراسىندا.
اعىمداعى جىلدىڭ وتكەن كەزەڭىندە كولىك باقىلاۋ ينسپەكسياسى سالماق پەن گاباريتتى اسىرعانى ءۇشىن 22 مىڭ جۇرگىزۋشىنى اكىمشىلىك جاۋاپكەرشىلىككە تارتىپ، 6 ملرد تەڭگە كولەمىندە ايىپپۇل سالدى.