ءومىردىڭ اسقىنعان قارقىنى مەن كۇندەلىكتى سترەسستەر ءبىزدى ءوز اعزامىزدىڭ سيگنالدارىن ەلەمەۋگە ءجيى ماجبۇرلەيدى. مىنەز-ق ۇلىقتاعى قانداي وزگەرىستەر الاڭداتۋى كەرەك ەكەنىن مەديسينا عىلىمدارىنىڭ دوكتورى، MD، PhD Newcastle University، الماتىداعى Med space كلينيكاسىنىڭ نەۆروپاتولوگ-يگلورەفلەكسوتەراپەۆتى ءاليا ساعىندىقوۆا ايتىپ بەردى، دەپ حابارلايدى infohub.kz سايتى.
دارىگەردىڭ ايتۋىنشا، كوپشىلىك دەنساۋلىقتىڭ ناشارلاۋىن كادىمگى شارشاۋمەن بايلانىستىرىپ، اعزانىڭ مۇمكىندىك شەگىندە جۇمىس ىستەي باستاعانىن بايقاماي قالادى. ال ءوزىڭدى تىڭداپ، ماماندارعا ۋاقىتىندا جۇگىنۋ وتە ماڭىزدى.
ءبىرىنشى بەلگى — ادامنىڭ اشۋشاڭ جانە شىدامسىز بولۋى. ونى جارقىن جارىق، قاتتى دىبىس، ادام كوپتىگى، جولداعى كەپتەلىس جانە باسقا دا نارسەلەر تىتىركەندىرەدى.
ەكىنشى بەلگى — زەيىننىڭ شاشىراڭقىلىعى مەن ۇمىتشاقتىقتىڭ پايدا بولۋى. مۇنداي كۇيدە ادام ەسىكتىڭ كىلتىن شىعارۋدى ۇمىتىپ، جارىقتى وشىرمەي قويۋى نەمەسە باسقا دا وسىعان ۇقساس قاتەلىكتەر جىبەرۋى مۇمكىن.
ءۇشىنشى بەلگى — قاتتى شارشاۋ. ادام ۇنەمى شارشاعاندى سەزىنەدى: وياندى، تۇردى — الدەقاشان شارشاپ تۇر. قاراپايىم ءىستى ورىنداۋ ءۇشىن دە ەرىك-جىگەردى جۇمىلدىرۋ قاجەت، بۇل وتە قيىنعا سوعادى.
دارىگەر بۇل بەلگىلەردى بايقاساڭىز، ولاردى ەلەمەۋگە بولمايتىنىن اتاپ ءوتتى، سەبەبى بۇل جۇيكە جۇيەسىنىڭ توزۋعا جۇمىس ىستەپ جاتقانىنىڭ العاشقى «قوڭىراۋلارى». جاعدايدىڭ ۋشىعىپ، اۋىر نەۆرولوگيالىق اۋرۋعا ۇلاسۋىنا جول بەرمەڭىز. مۇنداي بەلگىلەر پايدا بولعان كەزدە دەرەۋ نەۆروپاتولوگقا قارالۋ كەرەك.