جاڭا گۆينەيانىڭ ورماندارىنان ۋلى ەمەس جىلاننىڭ جاڭا ءتۇرى تابىلىپ، وعان Guns N' Roses توبىنىڭ گيتاريسى سلەشتىڭ قۇرمەتىنە ات قويىلدى. بۇل جاڭالىق كوپ جىلعى زەرتتەۋلەردىڭ ناتيجەسىندە اشىلدى، دەپ حابارلايدى infohub.kz.
جىلان 2006 جىلى تۇنگى ەكسپەديسيا كەزىندە تابىلعان بولاتىن. گەرپەتولوگ كريس وستين ۇلكەن اعاشتىڭ تۇبىنەن بەيتانىس داراقتى بايقاعان، الايدا ول كەزدە عالىمدار بۇل جەكە ءتۇر ەكەنىن بولجاماعان.
2026 جىلى امەريكاندىق زەرتتەۋشىلەر سىرتقى بەلگىلەرىنە سالىستىرمالى تالداۋ جاساپ، گەنەتيكالىق تەست جۇرگىزدى. Lielaphis slashi تۋىستاس تۇرلەردەن تەك قابىرشاق سانىمەن عانا ەمەس، گەنەتيكالىق تۇرعىدان دا ەرەكشەلەنەتىنى انىقتالدى. سونىمەن قاتار، ولاردىڭ مەكەندەيتىن ورتاسىندا دا ايىرماشىلىقتار بار ەكەنى بەلگىلى بولدى.
جاڭا ءتۇردىڭ ۇزىندىعى شامامەن 71 سانتيمەترگە جەتەدى، ءتۇسى قىزعىلت-قوڭىر. جىلان ۋلى ەمەس جانە ادامعا ءقاۋىپسىز. بۇل تۇقىمنىڭ وكىلدەرى تۇنگى تىرشىلىك جۇرگىزىپ، ۇلكەن اعاشتاردىڭ تۇبىندە اڭ اۋلايدى.
Lielaphis slashi اتاۋى زەرتتەۋ اۆتورلارىنىڭ ءبىرى، گەرپەتولوگ سارا رۋاننىڭ ارقاسىندا پايدا بولدى. ول بالا كەزىنەن Guns N' Roses توبىن جاقسى كورگەن، سول ۋاقىتتا ونىڭ باۋىرىمەن جورعالاۋشىلارعا دەگەن قىزىعۋشىلىعى دا ويانعان.
رۋان 12 جاسىندا Reptiles Magazine جۋرنالىنىڭ مۇقاباسىنان سلەشتى كورگەن: مۋزىكانت قولىندا ءوزىنىڭ تورلى پيتونىن ۇستاپ تۇرعان. كەيىن بۇل فوتوسۋرەت عالىمنىڭ جاڭا تۇرگە ات تاڭداعان كەزدە ەسىنە تۇسكەن.
رۋاننىڭ ايتۋىنشا، سلەش مۇراجايلارعا، حايۋاناتتار باعىنا جانە تابيعات تاريحىنا دەگەن سۇيىسپەنشىلىگى تۋرالى ءجيى ايتاتىن، سونداي-اق بالا كەزىندە كوشەدە جىلان ىزدەگەندى ۇناتاتىنىن دا ايتقان. بۇل قىزىعۋشىلىقتار زەرتتەۋشىگە جاقىن بولىپ شىققاندىقتان، ول گيتاريستىڭ ەسىمىن ءتۇر اتاۋىندا ماڭگىلىككە قالدىرۋدى ءجون كورگەن.
سلەشتىڭ ءوزى مۇنداي قۇرمەت ول ءۇشىن كۇتپەگەن جاعداي بولعانىن مويىندادى. «باۋىرىمەن جورعالاۋشىلاردى ۇزاق ۋاقىت جاقسى كورەتىن ادام رەتىندە، مەن وتە ريزامىن جانە قاتتى تولقىپ تۇرمىن. بۇل وتە كەرەمەت، مەن مۇنداي ءساتتىڭ كەلەتىنىن ەشقاشان ويلاماپپىن»، — دەدى مۋزىكانت.
عالىمدار Lielaphis slashi تۋرالى ازىرگە از بىلەدى. تۇنگى جىلاندار جاقسى جاسىرىنادى، ال جاڭا گۆينەيانىڭ ورماندارى ءالى دە جەتكىلىكتى زەرتتەلمەگەن. ارال وراسان زور بيوالۋانتۇرلىلىگىمەن ەرەكشەلەنەدى، ءبىراق ونىڭ ەكوجۇيەلەرىنە اۋىل شارۋاشىلىعى مەن پايدالى قازبالاردى ءوندىرۋ ءقاۋىپ توندىرۋدە.