زيمبابۆەدەگى كاريبا كولىندە اپتا باسىندا بولعان قايعىلى وقيعادا قازا تاپقاندار سانى 68-گە جەتتى. قۇتقارۋشىلار تاعى 22 ءمايىتتى سۋدان الىپ شىققان. قازا تاپقانداردىڭ 18ء-ى — بالالار، دەپ حابارلايدى infohub.kz سايتى.
سەيسەنبى كۇنى قاتتى تولقىننان امان قالماعان ەسكى كەمە كاريبا قالاسىنان ەلدىڭ سولتۇستىك-باتىسىنداعى اۋىلدىق جانە بالىقشىلىق قاۋىمداستىقتارعا بەت العان ەدى. بۇل ايماقتا جولدار قيراعان، قوعامدىق كولىك تاپشى. بيلىك كەمەدە قانشا ادام بولعانىن نەمەسە قانشا ادامنىڭ حابارسىز كەتكەنىن ءالى ايتقان جوق.
الدىن الا بولجام بويىنشا، جولاۋشىلار سانى 153-كە جەتۋى مۇمكىن، ال كەمەنىڭ سىيىمدىلىعى نەبارى 90 ادام. زيمبابۆەنىڭ توتەنشە جاعدايلار جونىندەگى اگەنتتىگى 77 ادام قۇتقارىلعانىن حابارلادى.
باستاپقىدا بيلىك بالالار سانى بەلگىسىز ەكەنىن، سەبەبى بيلەت جاسىنا تولماعاندار جولاۋشىلار تىزىمىنە ەنبەگەنىن مالىمدەگەن. كەيىن جاريالانعان پوليسيا تىزىمىنە سايكەس، قازا تاپقان بالالاردىڭ 16-سى 10 جاسقا دەيىنگىلەر، ەڭ كىشىسى نەبارى 1 جاستا.
كاريبا — الەمدەگى كولەمى بويىنشا ەڭ ۇلكەن جاساندى كول. ول 1950ء-شى جىلداردىڭ اياعى مەن 1960ء-شى جىلداردىڭ باسىندا زامبەزي وزەنىن بوگەۋ ارقىلى پايدا بولعان. كولدىڭ ۇزىندىعى 200 شاقىرىمنان اسادى، كەي جەرلەردە ەنى 40 شاقىرىمعا جەتەدى. كاريبا كولىن زيمبابۆە مەن زامبيا بولىسەدى، ولاردىڭ شەكاراسى كولدىڭ ورتاسىمەن وتەدى.