باتىس قازاقستان وبلىسىندا سوت اۋداندىق اۋرۋحانانى توعىز ايعا جۋىق ۋاقىت بويى قاتەرلى ىسىككە دياگنوز قويىلماعان ەر ادامنىڭ وتباسىنا وتەماقى تولەۋگە مىندەتتەدى. مەديسينالىق كومەك كورسەتۋ كەزىندە ورەسكەل بۇزۋشىلىقتار جىبەرىلگەنى انىقتالدى، دەپ حابارلايدى infohub.kz.
ءىس ماتەريالدارى بويىنشا، 2023 جىلعى جەلتوقساندا بايتەرەك اۋدانىنىڭ تۇرعىنى دارينسكوە كەنتىندەگى №2 اۋرۋحانانىڭ جالپى پراكتيكا دارىگەرىنە ءجيى قۇسۋ جانە قارا ءناجىس — اسقازان-ىشەك جولدارىنىڭ اۋىر اۋرۋلارىن كورسەتۋى مۇمكىن بەلگىلەرگە شاعىمدانعان.
وسىعان قاراماستان، ەمدەۋ توعىز ايعا جۋىق ۋاقىتقا سوزىلدى. وسى ۋاقىت ىشىندە پاسيەنت ۋاقتىلى دياگنوستيكادان وتپەدى، ال 2024 جىلعى 15 تامىزدا قاتەرلى ىسىك اۋرۋىنان قايتىس بولدى.
ەر ادام قايتىس بولعاننان كەيىن ونىڭ جۇبايى مەن بالاسى اۋداندىق اۋرۋحاناعا تالاپ-ارىز بەرىپ، ءارقايسىسىنا 10 ميلليون تەڭگەدەن مورالدىق زيان ءۇشىن وتەماقى ءوندىرۋدى تالاپ ەتتى.
مەديسينالىق مەكەمەنىڭ وكىلدەرى مەن ەمدەۋشى دارىگەر تالاپتى مويىندامادى. ولار پاسيەنتكە فگدس، زەرتحانالىق زەرتتەۋلەر مەن سكرينينگتەن ءوتۋ ۇسىنىلعانىن، ال تالداۋ ناتيجەلەرى ولاردىڭ پىكىرىنشە، سىني جاعدايدى كورسەتپەگەنىن مالىمدەدى. سونداي-اق دارىگەرلەر اۋرۋدىڭ جاسىرىن وتكەنىن جانە قولايسىز بولجامى بولعانىن، سوندىقتان ولاردىڭ ارەكەتتەرى مەن پاسيەنتتىڭ ءولىمى اراسىندا سەبەپ-سالدار بايلانىسى جوق ەكەنىن ايتتى.
الايدا سوت تەكسەرۋ ماتەريالدارىن زەردەلەپ، كەرىسىنشە قورىتىندىعا كەلدى. دارىگەر زەرتحانالىق زەرتتەۋ ناتيجەلەرىنە ءتيىستى باعا بەرمەگەن، قازاقستان دەنساۋلىق ساقتاۋ مينيسترلىگىنىڭ كلينيكالىق حاتتامالارىن ساقتاماعان، سونداي-اق پاسيەنتتى گاستروەنتەرولوگ، ينفەكسيونيست، گەپاتولوگ، حيرۋرگ، تراۆماتولوگ جانە ونكولوگ سياقتى بەيىندى ماماندارعا ۋاقتىلى جولداماعانى انىقتالدى. سونىمەن قاتار، پاتوگيستولوگيالىق قورىتىندى العاننان كەيىن دە ونكولوگقا جولداما كەشىكتىرىلىپ رەسىمدەلگەن.
سوتتا مەديسينالىق كومەك كورسەتۋ كەزىندە جىبەرىلگەن بۇزۋشىلىقتاردىڭ ءدال وسى قاتەرلى ىسىك اۋرۋىنىڭ كەش انىقتالۋىنا اكەلگەنى اتاپ ءوتىلدى.
«ق ر ازاماتتىق كودەكسىنىڭ 921-بابىنا سايكەس، قىزمەتكەردىڭ ەڭبەك مىندەتتەرىن ورىنداۋ كەزىندە كەلتىرىلگەن زيان ءۇشىن جۇمىس بەرۋشى جاۋاپتى بولادى. وسى سەبەپتەن قارجىلىق جاۋاپكەرشىلىك مەملەكەتتىك كوممۋنالدىق كاسىپورىنعا جۇكتەلدى»، — دەپ حابارلادى زقو سوتى.
ناتيجەسىندە سوت تالاپتى ءىشىنارا قاناعاتتاندىردى. «بايتەرەك اۋدانى №2 اۋرۋحاناسى» شجق مكك مارقۇمنىڭ جۇبايى مەن بالاسىنا مورالدىق زيان ءۇشىن 700 مىڭ تەڭگەدەن وتەماقى تولەۋگە مىندەتتەلدى.
سوت شەشىمى ازىرگە زاڭدى كۇشىنە ەنگەن جوق جانە وعان شاعىم جاسالۋى مۇمكىن.