قازاقستاندا وتباسىلىق زورلىق-زومبىلىق قۇرباندارىنا كومەكتەسەتىن ورتالىق قىزمەتكەرىنە ۇكىم شىقتى. ول ءوز ايەلىنە قاتىگەزدىك تانىتقانى ءۇشىن ايىپتالۋشىلار لاۋازىمىندا وتىردى، دەپ حابارلايدى infohub.kz سايتى.
جەتىسۋ وبلىسى پروكۋراتۋراسىنىڭ مالىمەتىنشە، قاراتال اۋداندىق سوتى وتباسىلىق زورلىق-زومبىلىق جاساعان ورتالىق قىزمەتكەرىنە قاتىستى قىلمىستىق ءىستى قارادى.
قىلمىس جاساعان كەزدە ول وتباسىلىق-تۇرمىستىق زورلىق-زومبىلىقتان زارداپ شەككەندەرگە كومەك كورسەتەتىن «جانۇيا» ورتالىعىنىڭ زاڭگەرى بولىپ جۇمىس ىستەگەن. الايدا، جابىرلەنۋشىلەردىڭ قۇقىعىن قورعاۋداعى كاسىبي قىزمەتىنە قاراماستان، ول ءوز ايەلىنە قاتىستى قۇقىققا قايشى ارەكەت جاساعان.
سوت تالقىلاۋى بارىسىندا مەملەكەتتىك ايىپتاۋشى ونىڭ كىناسىن تولىق دالەلدەدى. سوت ۇكىمىمەن كىنالىگە 200 ساعات قوعامدىق جۇمىس جازاسى تاعايىندالدى. ۇكىم زاڭدى كۇشىنە ەندى.
جەتىسۋ وبلىسى پروكۋراتۋراسى وتباسىلىق زورلىق-زومبىلىققا جول بەرىلمەيتىنىن جانە قازاقستان رەسپۋبليكاسىنىڭ زاڭناماسىندا كوزدەلگەن جاۋاپكەرشىلىككە اكەپ سوعاتىنىن ەسكە سالادى. زاڭدىلىقتى قامتاماسىز ەتۋ جانە جابىرلەنۋشىلەردىڭ قۇقىقتارىن قورعاۋ جۇمىستارى پروكۋراتۋرا ورگاندارىنىڭ تۇراقتى باقىلاۋىندا.