Aqyn inime
Azyraq qulaǵyn sal, aqyn inim,
Oıymyz, rýhymyz jaqyn, inim.
«Aǵalyq pravosyn qolyma alyp,
Kelemin aıtaıyn»,— dep aqyl, inim!

«Ózimdi aǵańmyn»,— dep úlkeıtemin,
Onymdy kóremisiń maqul, inim.
Adasqan aǵańyzdyń jeri bolsa,
Tileımin ete gór dep ǵapý, inim.

Jaı jatsań jańylmaısyń, adaspaısyń,
Kúreste kim ketpeıdi ǵapyl, inim.
At qoıǵan az-kóbine qaramastan,
Aqylǵa bizder jarly paqyr, inim.

Dońyzdaı talǵamaı jep semirgender,
Sanalyp aqyldyǵa jatyr, inim.
Súıikti mıllátińe bolam deseń,
Nashardyń kóbirek je haqyn, inim.

Syılasyn deseń jurtyń qadir tutyp,
Aıǵyrsyp momyndarǵa aqyr, inim.
Bilimdi el ishinde bolam deseń,
Sheshensip, joqty sóılep lapyr, inim.

Qolyńnan munyń biri kelmes bolsa,
Kisimsip eń bolmasa qaqyr, inim.
Sózińdi tyńdataıyn deseń jurtqa,
Et asyp tabaq-tabaq shaqyr, inim.

Aýzymen oraq oryp, bárin de eter,
Qymyzdy shara-shara sapyr, inim.
Etpenen qymyz berip sóılep kórseń,
Aıtqanyń jurtqa baldaı tatyr, inim,
Aqylyń Aplatondaı bolsa-daǵy,
Qymyz ben eti joq qur tatyr, bilim.


You Might Also Like