InfoHub Logo

Búgin Lev Gýmılev atyndaǵy Eýrazıa ulttyq ýnıversıtetinde memleket jáne qoǵam qaıratkeri, xalyq jazýshysy Ábish Kekilbaev atyndaǵy aýdıtorıa ashyldy.

Sol jerde Ábish aǵanyń ómiri men shyǵarmashylyǵyna arnalǵan alǵashqy dáris oqylyp, Kekilbaevtyń ataýly shákirtaqysy tabystaldy.

Ýnıversıtet rektory Erlan Sydyqovtyń aıtýynsha, jańadan ashylǵan aýdıtorıada kúndelikti dáristerdi ótkizý arqyly qazaqtyń biregeı jazýshylarynyń biri - Ábish Kekilbaevtyń shyǵarmashylyǵymen etene tanystyrý josparlanǵan. "Búgin Ábish aǵanyń dúnıeden ozǵanyna jyl tolyp otyr. Jyldyq asy berilip jatyr. Sol kúnge sáıkestendirip, Eýrazıa ulttyq ýnıversıtetinde ataqty jazýshy, qoǵam qaıratkeri Ábish Kekilbaevtyń aýdıtorıasyn ashyp otyrmyz. Belgili tulǵalardyń esimimen aýdıtorıa ashý - bul ýnıversıtetimizde qalyptasqan jaqsy bir dástúr. Óıtkeni sol tulǵalarlyń ómiri, shyǵarmashylyǵy men qaıratkerliginen búgingi  jastar tárbıe alýy qajet. Baǵdarlamamen oqytý óz aldyna, al tulǵalar arqyly tárbıeleý, ol da bilim berý ádisteriniń biri dep bilýimiz kerek. Aýdıtorıa ashý bul jaı taqtaısha ile salý emes. Ol jerde oqylatyn dárister, beriletin sabaqtar erekshe bir sezimde ótýi tıis. Máselen, búgingi sharaǵa qatysqan azamattar myna aýdıtorıada Ábishtiń ıisi ańqyp tur dedi. Odan artyq baǵa bar ma? Demek, jastardyń boıyna osy sezimdi quıa alatyn bolsaq, ol adamnyń rýxanı jaǵynan baı azamat bolyp qalyptasaýyna óz septigimizdi tıgizemiz", -  deıdi E.Sydyqov.

Sondaı-aq búgin Ábish Kekilbaev atyndaǵy aýdıtorıada alǵashqy dáris oqyldy. Aqyn-jazýshylar jazýshynyń ómirinen jyly estelikterin aıtyp, óleń shýmaqtaryn arnady. Aýdıtorıanyń ashylýyna Á.Kekilbaevtyń jubaıy Klara apaı da qatysty.

"Mynaý endi, Ábish bar kezde aýyz ashpaıtyn edim. Ol ketkesin sóıleýge týra kelip tur. Úsh-tórt oblysty araladyq, bárinde de azdap sóılegenim bar. Sóıte-sóıte úırenetin shyǵarmyn. Bir úıde bir sheshen bolýy kerek deıdi ǵoı. Sol sózdiń bári Ábishte bolatyn. "Alyp anadan týady" deıdi. Sol anamyz jaqsy kisi bolǵan. Jalǵyzym dep, onyń tilegin ómir-baqı tilep ótken. Jalǵyzynyń azamat bolýyna 40 jyl eńbek etken. Ábishtiń ózi baıaǵyda stýdent kezinde bir top jas jazýshylardy jınap, jastar uıymyn qurǵan. Sol kezde bári Muxtar Áýezovke baryp, sol kisiniń bir aýyz sózin estigisi kelip, Ábishti aldaryna salady eken. Sodan ol Áýezovtiń úıine baryp, jazýshynyń jastar uıymynyń jınalysynda sóz sóıleýin suraǵan. Muxtar aǵa kelip, jıyndy ashqanda "Myna baladan birdeńe shyǵady" degen eken. Endi, ol kezde akademıkter az. Sol sebepti jastar ondaı adamdarmen amandasyp, bir tildeskenderine máz bolyp júretin. Qazir jaqsy ýaqytqa jettik. Keremet ýnıversıtetter ashylyp jatyr. Sondyqtan jastarǵa aıtarym, texnıkanyń bárin bilgen durys. Sonda da kitaptyń dámin tatyp, aǵa-apalaryńyzdan rýxanı taǵylym alǵandaryńyz durys", - dep atap kórsetti Klara Jumabaeva.

Búgingi shara aıasynda ýnıversıtettiń jýrnalısıka jáne saıasattaný fakúltetiniń 2-kýrs stýdenti Ázıza Súıinishqalıevaǵa Á.Kekilbaev atyndaǵy ataýly stıpendıa tabystaldy.

 

---