InfoHub Logo

Batys óńirlerde tehnıkalyq mamandyq granttarynyń sany artady. QR Premer-Mınıstri Álıhan Smaıylov Úkimet otyrysynda osyndaı tapsyrma berdi.

«Áleýmettik blok boıynsha. Birinshi, Eńbek mınıstrligi jumysqa ornalastyrýdy jáne áleýmettik qoldaýdy qajet etetin azamattardyń naqty sanyn anyqtap, eńbek salasyn sapaly jańartý jumysyn júrgizsin. Múddeli memlekettik organdarmen birlesip, bıznes-ıdeıalardy iske asyrýǵa arnalǵan granttar men eńbekaqy mólsherin ulǵaıtý, «Jastar praktıkasyna», «Alǵashqy jumys orny» jobasyna qatysý merzimin arttyrý boıynsha sharalar qabyldasyn. Ulttyq ekonomıka jáne Eńbek mınıstrlikteri bir aı merzimde «Halyq tabysyn arttyrý» baǵdarlamasynyń jobasyn ázirlep Úkimetke engizsin», - dedi Premer-Mınıstr.

Al Bilim mınıstrligine múddeli memlekettik organdarmen birlesip, muǵalimder jetpeıtin óńirlerge ustazdardy tartý baǵdarlamasyn ázirlep, olardy tıisti áleýmettik qoldaý sharalaryn qarastyrý júkteldi.

«Buǵan qosa bedeldi sheteldik joǵary oqý oryndarynyń bes fılıalyn onyń ekeýin Batys óńirde ashý sharalaryn qabyldasyn. Sondaı-aq, memlekettik bilim berý tapsyrysynyń jobasynda birinshi kezekte Batys óńirlerde tehnıkalyq baǵyttar boıynsha granttar sanyn arttyrý qajet. Halyq tyǵyz qonystanǵan óńir jastarynyń joǵary oqý oryndarynda bilim alýy úshin nysanaly grattardy kózdeý qajet», - dedi Úkimet basshysy.

Sondaı-aq, ol «Qazaqstan halqyna» qory qashan qurylatynyn aıtty.

«Úshinshi, Densaýlyq saqtaý, Bilim, Mádenıet, Qorǵanys, Qarjy, Ulttyq ekonomıka mınıstrlikteri 1 aqpanǵa deıin «Qazaqstan halqyna» qoǵamdyq áleýmettik qoryn qurý máselesin qarastyrsyn. Búgingi jaǵdaıdyń qanshalyqty kúrdeli ekenin bárińiz bilip otyrsyzdar. Barynsha bir kisideı jumylyp, úılesimdi jumys isteýimiz qajet. Orynbasarlarym óz salasy boıynsha jáne memlekettik organdardy naqty úılestirý men baqylaýdy uıymdastyrsyn», - dedi Álıhan Smaıylov.

---