InfoHub Logo

Ádettegi kúnderdiń biri edi. Qoıshy shaıǵa toıyp alyp, terlep, keıin baryp otyrǵan soń, Abaı:

Áı Kókshe, endi ertegi aıtshy? — deıdi.

Qoıshy: Abaı aǵa, kedeıde ertegi bola ma? Ne aıtamyn?

Abaı: Seni kim kedeı qyldy?

Qoıshy: Kim bolýshy edi, Qudaı-daǵy.

Abaı: Qudaımen burynnan arazdyq, óshtigiń bar ma edi?

Qoıshy: Joq!

Abaı: Endeshe nege jarly bolǵanyńdy Jaratqannan kóresiń?

Qoıshy: Mal bermegen soń aıtqanymǵoı.

Abaı: Qudaıdyń elge úlestirip jatqan maly bar ma edi?

Qoıshy úndemedi. Abaı qoıshyǵa qaraǵan kózin aýdaryp, biz jaqqa, kópke qarady da: «Mine, kópshiliktiń sózi osylaı keledi. Bul zor adasqandyq. Jas shaǵynan jalqaýlyqqa salynyp alady da, talap qylyp, talpynyp, alysqa baryp, eńbek qyp, mal tappaıdy. Sol jalqaýdyń qyrsyǵynan óz eńbegin ózi baǵalamaı, maly barǵa jaldanady. Jalqaý adamdar ishse tamaqqa, kıse kıimge jarymaıdy, joqshylyqtan arylmaıdy. Al joqshylyqty, kedeılikti Qudaıdan kóredi. Qudaı oǵan erinbeı eńbek qyp, mal tappa dep pe?...» - dedi.

Sonda men Abaıǵa: Sizdiń aıtqan sózińizdi uǵynatyn kedeıde aqyl-bilim bola ma? — dedim.

Abaı: Aqyl malda bolmaıdy, basta bolady, kedeıdiń de baıdyń da basy bar emes pe? — dedi.

Dáýletıar Bitimbaıulynyń esteliginen

---