Bir dáýren kemdi kúnge – bozbalalyq
Bir dáýren kemdi kúnge – bozbalalyq,
Qartaımastaı kórmelik, oılanalyq.
Jastyqta kókirek zor, ýaıym joq,
Deımiz be eshnárseden qur qalalyq.

Bar oıy - óleń aıtyp, án salalyq,
Bireýdi qaljyń qylyp qolǵa alalyq.
Qyzdy aýylǵa qyryndap úıir bolsa –
Kóńiline zor qýanysh bir badalyq.

Demeńder ónbes iske jubanalyq,
Aqyl tapsaq, mal tapsaq, qýanalyq.
Qyzdy súıseń, birdi-aq súı, tańdap taýyp,
Kórse qyzar, kúnde asyq – dıýanalyq.

Jastyqta bir kúlgeniń – bir qaralyq,
Kúlki baqqan bir kórer bısharalyq.
Áýeli óner izdelik qoldan kelse,
Eń bolmasa eńbekpen mal tabalyq.

Toı bolsa, ton kıelik, júr, baralyq,
Birimizdi birimiz aýdaralyq.
At aryqtar, ton tozar, qadir keter,
Kúlkini onsha kúılep, shýlamalyq.

Ýaıym – er qorǵany, esi barlyq,
Qıyny bul dúnıeniń – qoly tarlyq.
«Ehe-ehege» elirme, bozbalalar,
Bul bes kúndik bir maıdan er synarlyq.

Salynba, qylsań daǵy san qumarlyq,
Aldyńda ýaıym kóp shoshynarlyq:
Jarlylyq, jalynyshty jaltań kózdik,
Súıkimi, ıkemi joq shaldýarlyq.

Ásem saldyq ólgenshe kim qylarlyq,
Oǵan da mezgil bolar toqtalarlyq.
Urlyq qylar, tentirep tamaq asyrar,
Bolmaǵan soń jumys qyp mal tabarlyq.

Basynda áke aıtpasa aqyl jarlyq,
Aǵaıyn tabylmasa oı salarlyq,
Qaljyńbassyp ótkizgen qaıran dáýren,
Túbinde tartqyzbaı ma ol bir zarlyq?

Osy elde bozbala joq sózdi uǵarlyq,
Úzilmes úmitpenen bos qýardyq.
Áıteýir aqsaqaldar aıtpady dep
Júrmesin dep az ǵana sóz shyǵardyq.


You Might Also Like