Bir sulý qyz turypty han qolynda,
Han da janyn qyıady qyz jolynda.
Altynkúmis kıgeni, qamqa, torǵyn,
Kútýshi qyz kelinshek júr sońynda.
Degen sóz: "Buqa býǵa, azban dýǵa",
Han qaryq bop túsip júr aıǵaı shýǵa.
Etimdi shal syıpaǵan qurt jesin dep,
Jartastan qyz qulapty tereń sýǵa.
Sán saltanat jubantpas jas júrekti,
Kim de bolsa turǵysyn kóksemekti.
Mezgili ótken dáýrendi qýalaǵan,
Ne qylsyn bir qartaıǵan óý súıekti.
Kári, jas dáýreni ózge tatý emes,
Epke kóner et júrek satý emes.
Kimde kim úlken bolsa eki múshel,
Mal berip alǵanmenen satyn emes.
Eserler jas qatyndy tutady eken,
Jas qaıǵysyn bildirmeı jutady eken.
Ortasynda bulardyń mahabbat jok,
Tusap qoıǵan qashyrar buqa ma eken?
Baı qartaısa, malyna berer shylbyr,
Mal ómirdi janǵyrtpas, qudaı urǵyr.
Bireýdiń qyzyn alyp malǵa satyp,
Baıaǵyny izdegen qandaı qurǵyr?
Qatynym qalaı demes aqsaqal baı,
Sonymen dos bop júrsiń,ıapyrym aı!
Qý qatynnyń maıyssa, máz bolasyń,
Shaıtannyń shákirtiniń qylyǵyn aı!
Qartań baı, qatty saq bol, tilge kónseń,
Múıiz shyǵar qatynnyń tiline erseń.
Tipti ońbassyń, ózińe óziń máz bop,
Dastarqan men qatyndy maqtan kórseń.
Kinásiz báıbishemen bolady araz,
Jastyń kóńili jylymas, ol ózine az.
Bireýi kók baldyrǵan, biri qýraı,
Bir jerge qosyla ma qys penen jaz?
Únem bolmas quıryqty bulańdatqan,
Saýyryna shapaqtap, súip jatqan.
Eki kóńil arasy jylshylyq jer,
Ony qaıtyp qosady ol ant atqan?

---