Kárilik – qutylmaıtyn bir qazǵan or,
Qaıratsyzǵa ómirdiń beıneti zor.
Ólmeıtin, jazylmaıtyn sol aýrýmen
Jalǵanda jan bolmaıdy káriden qor.

Jas balasyn álpeshter ata-anasy,
Báıek bolyp kelgenshe bar shamasy.
Súıtken uly erjetip jigit bolsa,
Buzylar ata-anaǵa kózqarasy.

Qartaıǵan soń balaǵa ata jaqpas,
Atanady «aljyǵan bir qý qaqpas».
Súıgen jary tilinen súımek túgil,
Onyń etin mensinip jylan shaqpas.

Jar súımese, balasy jaı bilmese,
Qandy jasy kózinen qaıtyp aqpas.
Iem dep erkelegen ıt bolmasa,
Ol sorly jyly júzdi bir dos tappas.

Árıne, balań bilse qadirińdi,
Oryndap eki aıtqyzbaı ámirińdi.
Jasyńnan jany syrlas jaryń bolsa,
Qylp etkizbeı biletin tamyryńdy.

Olaı bolsa tilegiń tabylyndy,
Nazalanba, boıǵa jı sabyryńdy.
Ol bolmasa, ómirden ólim artyq,
Óziń qazyp daıynda qabyryńdy.

---