Men adamnyń tappaımyn ónerlisin...
Men adamnyń tappaımyn ónerlisin,
Erinbeı eńbek qylǵan kóp jumysyn.
Ish jaryp, ishek jalǵap, súıek qıyp,
Jamaıdy erin, muryn, túsken tisin.
Aeroplan‚ telefon‚ gramofon,
Elektr, radıı men magnıt isin.
Tereń oımen teksermes nadandardy
Degizgen: «Saıtanbysyń, Táńirimbisiń?»

Osynsha óner taýyp asqan adam,
Álemniń qıyn syryn ashqan adam.
Ol túgil ómirge de aıla tabar,
Ólmeı jeter birtalaı jasqa da adam.
Biraq adam óz janyn tanymaıdy,
Biledi bir ózinen basqany adam.
Tirshilik – joǵalatyn jan sıpaty,
«Janym joq»,– dep bolady masqara adam.
Jalam emes‚ jazypty pán dep muny,
Ne demes oıy jetpeı sasqan adam.
Janynyń bastan baryn baıqamapty,
Psıholog ǵylymyn shashqan adam.

Jan joldan qosyldy dep, pán de, din de,
Aqyldy baılap qoıǵan soǵan múlde.
Eń basqy zat: jany bar, aqyldy zat,
Ony oılaǵan adam joq osy kúnde.
Bar nárse joǵalmaıdy, ózgeredi,
Jan joǵalmas dep oıla, sony bil de.
Jan tán jasar, tán jandy jarata almas,
Tereń oılap, sózimdi qulaqqa il de.

Jan – qoja, tán degeniń – jannyń quly,
Nápsi nege bilmegen buryn muny?
Oılashy: jan tapty ma, tán tapty ma
Joǵarǵy keremetti neshe qıly?
Tán – tereze, qaraıtyn jan – ıesi,
Jannan shyǵar aqyl men oıdyń shyny.
«Joldan shyqqan jan jolda joǵalar»,– dep,
Sandyraqtap aıtqanmen, joq dáleli.
Dálelsiz sóz – soqqan jel, ushqan tozań,
Taza aqyldyń aldyńda joq qoı quny.
Mısyz, kúnshil, birezý, ózimshilder
Alasursyn, asqaqtap, qozsa jyny.
Soqyr bilmes jaryq pen qarańǵyny,
Kóńil kózi synasyn‚ bolsa mini.
Ólmeı turyp dálelin ózime aıtsyn,
Meniń daýym aıtylmas ólgen kúni.


You Might Also Like

Jańalyqtar

Jarnama