Qýlar
Jigitter, qor da emespin, kedeı de emen,
Kemdik kórgen jerim joq eshtemeden.
Qudaı jolyn bile almaı, qý bılegen
Elden basqa qaıǵym joq, munyma sen.

Baıqańyz, bul sózimniń mini bar ma,
Kúnde anttasqan bul eldiń dini bar ma?
Aýzymen qus tistegen jaqsyńyzdyń
Qý men sumǵa jalynbaı kúni bar ma?

Qaısyńyzǵa kelse de, orny tórde,
Bir semiz at daıyn qyl, tamaq ber de.
Quladyndaı qý bolyp jylpyldap baq,
Syltaý qylyp ketpesin qıyn jerde.

Óńkeı qýlar, myqtynyń bárin jaırat,
Taqymyna buraý sal, syryn saırat.
Bar jaqsymyz qýlardyń quly boldy,
Tepse temir úzerlik qaıran qaırat!

Baılardyń qý bilmegen syry qalmas,
Tamam qýdyń birimen-biri jalǵas.
Araz bolyp júrse de paıdasy bir,
Orny daıyn ol ıttiń, qury qalmas.

Talǵamaı jaqyndy urar, alysty urar,
Óńkeı baıdy elirtip jarystyrar.
Joldasynan buzylyp bir qý shyqsa,
Ony bir qý jetelep tanystyrar.

Jaýyńnyń jan joldasy osy deıdi,
Munan tasa syry joq dosy deıdi.
Ne qylsań da kóńilin ornyqtyryp,
Osymenen shyn jaqyn bolshy deıdi.

Pirge qolyn bergendeı, myqty baıǵus,
Umtyla kór, tabyldy jaqsy jumys.
Janyn berip jylpyldap, malyn berip,
Kóńili senip alǵan soń ol – bir tynys.

Kúnde baıqap júredi qylǵanyńdy,
Ańdıdy jatqanyńdy, turǵanyńdy.
Ábden toıyp alǵan soń bult beredi,
«Kórdiń be endi,– deıdi de,– urǵanymdy?»

Urdym dep barar eski joldasyna,
Aldap keldi – kádirli bolmasyn ba.
Jalmaýyzdy dos qylǵan jaqsylaryń,
Qolyńdy ápkel, túbinde ońbasyna.

Aldamasa, áıteýir, jep júredi,
Jemeı qashan ondaı qý tek júredi.
Aty aryqtaý, tamaǵy olqy bolsa,
– Men jaýyma ketemin,– dep júredi.

Muny estise qylpyldar baıdyń k...i,
«Jaman edi-aý kápirdiń,– dep,– nıeti»,
– Semiz atyn daıyn qyl, aqshasyn ber,
Táýir, tolyq jasalsyn shaı men eti.

Jaıyń osy, óńkeı sum jalynǵanyń,
Laıyq pa solarǵa tabynǵanyń.
Qudaı bergen malyńdy qýǵa shashyp,
Osynsha eser bolǵanyń ne qylǵanyń.

Onan-daǵy birińe biriń bılet,
Bılegeniń túzý aıt, adalǵa jet.
Muny uqpasań, ońalma, onan da ármen,
Qýlar túgil ıt jesin, túý, báleket!


You Might Also Like

Jańalyqtar

Jarnama