Qyryq jyldan ótip jasym,
Aqylym boldy syrlasym,
Otyz jyldyq zamandasym,
Imanym – basshy joldasym.

Oqı almaı ǵylym tilin,
Tuman bolyp jaryq kúnim,
Qasyqpen arshydym jylym,
Ne kórmedi ǵaryp basym.

Álemdi oımenen kezdim,
Perevod maltasyn ezdim,
Jarymnyń sáýlesin sezdim,
Molanyń aqtaryp tasyn.

Moladan shyqty kóp nurlar,
Nury ólsheýsiz sulý bir jar:
«Deme,– dedi,– ǵylymym tar,
Erinbeseń, meni alasyń».

Esim shyǵyp qýanǵannan,
Adastym men ar, ımannan,
Kúder úzip shybyn jannan,
Bolyp tur ımanym qasym.

Jarymnyń nuryna janyp,
Tánim kómir bola qalyp,
Júregimdi jaryp alyp,
Aǵyzdy aramyn, nasyn.

Berip jarym tilegimdi,
Tazartqan soń júregimdi,
Dedi: «Ustat bilegińdi».
Dedim: «Qaıda aparasyń?»

«Adamzattyń qylar isin,
Imanyn, ary, nápsisin,
Jaramyn, kórsetem ishin,
Nıeti men isher asyn».

Áýeli sopyny soıdy,
Júregin aldyma qoıdy,
Kórip edim talaı toıdy,
Dedim men: «Astapyralda!»

Qylypty tasbıyǵyn tuzaq,
Ilingen kóp momyn qazaq,
Býynyp tartqan ol azap,
Dedim men: «Astapyralda!»

Popy men moldasyn jaryp,
Kórsetti aldyma salyp,
Keremetin kórip qalyp,
Dedim men: «Astapyralda!»

Quran, Injil qylyp qaqpan,
Adam aýlap soıyp jatqan,
Shapanymen qanyn japqan,
Dedim men: «Astapyralda!»

Bireýdi soıdy: «Bul – pir»,– dep,
«Qıanatty qylyp júr»,– dep,
«Júregine qara bir»,– dep,
Dedim men: «Astapyralda!»

Aıýansha lyqylyqtap,
Múrıtin júr buǵalyqtap,
Tańyp sáldesimen myqtap,
Dedim men: «Astapyralda!»

Alyp kelip aq patsany,
Baýyzdalǵan shyǵyp jany,
«Jaryp kórshi,– dedi,– káni»,
Dedim men: «Astapyralda!»

Ishi tolǵan adam táni,
Balasy ám zoraıǵany,
Keıiniń shyqpaǵan jany,
Dedim men: «Astapyralda!»

Ulyq bolǵan talaı myqty,
Qylyp júrgen jýandyqty,
Ishinen kóp bále shyqty,
Dedim men: «Astapyralda!»

Nashardyń eńbegin jegen,
Jylatqan ol talaı negen,
Isinen seskenip denem,
Dedim men: «Astapyralda!»

Jáne soıdy bı-ekemdi,
«Jediń ǵoı,– dep,– talaı jemdi»,
«Anyqtap qara,– dep,– endi»,
Dedim men: «Astapyralda!»

Jylan, shaıan jegen jemi,
Kóńilge aıan para ekeni,
Sasypty jeminiń deni,
Dedim men: «Astapyralda!»

Bir sáýdeger ósimshil baı,
Ony soıdy analardaı,
Sasyǵynan shydaı almaı,
Dedim men: «Astapyralda!»

Paralap ol ulyqty alǵan,
Somyna som ósim salǵan,
Qıanatpen qosyp jalǵan,
Dedim men: «Astapyralda!»

Qıanatshyl aram dosty,
Basyn kesip, ishin osty,
Ol aýzynan boǵyn qusty,
Dedim men: «Astapyralda!»

Dosyn aldap malyn jepti,
Áıelimen tamyr bopty,
Tamaq qylǵan talaı boqty,
Dedim men: «Astapyralda!»

Áset alǵysh ónershildi,
«Mini, kór»,– dep ishin tildi,
Aramdyǵyn aıan qyldy,
Dedim men: «Astapyralda!»

Qazir istep beremin dep,
Talaıdy aldap zadatke jep,
Qylyp júrgen osyndaı ep,
Dedim men: «Astapyralda!»

Ákeldi bir kelinshekti,
Salaqtatyp eki emshekti,
«Bu ne?» – dep qarnyna tepti,
Dedim men: «Astapyralda!»

Bolsa da óz baıy jap-jas,
Talaımen bolǵan ol oınas,
Sol oınastan býaz ol nas,
Dedim men: «Astapyralda!»

Bir erkekti jáne soıǵan,
Qarnyn aldyma qoıǵan,
Áıeldiń astyna toıǵan,
Dedim men: «Astapyralda!»

Mise qylmaı taza jaryn,
Oınasqa salǵan ol baryn,
Buzyp eldiń qatyndaryn,
Dedim men: «Astapyralda!»

Men aq júrek degenderdi,
Terisin soıdy da berdi,
Eti – qasqyr, kózim kórdi,
Dedim men: «Astapyralda!»

Ádilettiń atyn satqan,
Jala jaýyp momyndy atqan,
Qoı terisin kıip jatqan,
Dedim men: «Astapyralda!»

Alyp kelip urylardy,
«Mini, kór»,– dep ishin jardy,
Jegen talaı momyndardy,
Dedim men: «Astapyralda!»

Kóbi men istegen isim,
Buryn kórgen bul bir túsim,
Tazarǵan soń sonan ishim,
Dedim men: «Astapyralda!»

---