Taýyq nege shaqyrar saǵat saıyn,
Deı me ýaqyt ótkenin uqtyraıyn.
Keıde zarly daýyspen ıt ulıdy,
Bilemisiń, qylyp tur neni ýaıym?
Gúldi kórse, muńly ánmen bulbul saırap,
Aıtyp tur ma baıansyz ómir jaıyn.
Tań bozarsa, aspanda quıqyljytyp,
Ándi nege salady boztorǵaıyń?
Ǵylymdylar tekserip kórdi me eken,
Álemniń qıyn syrly osyndaıyn.
Aqylym sonyń syryn tap dep otyr,
Desem de oı jetpesti men qýmaıyn.
Salamyn sasqanymnan oı jotaǵa,
Qyla almaı aıýan tilin tipti paıym.
Bos saırap, tekke ulıdy deıin desem,
Ol dálelsiz ekeni oıǵa daıyn.
Árıne, munda bir syr bolsa kerek,
Deımin de sheshý tappaı alaqtaıym.
Ánsheıin kereksizdi óleń qylyp,
Degem joq ermek qylyp, bos oınaıyn.
Bul da bir jaralystyń qıyn syry,
Dep edim bilgenderden syr suraıyn.
Eshkim jaýap bermese bul sózime,
Ózimniń oı jotamdy endi aıtaıyn:
Aıýanda da aqyl bar adamdaıyn,
Deseń, oılan ondaıdan syr tabaıyn.
Kóńil kózin ash-taǵy aqylǵa sal,
Qur qulaqpen tyńdama, qalqataıym.
Olar dep tur: «Oıǵa alyp bir Qudaıyn,
Zor qudiretin álemge uqtyraıyn».
Qulshylyq, namazy men ımany sol,
Kúnde bir, aıynda bir, saǵat saıyn.
Demeıdi: «Bosqa ulyp, tek saıraıyn»,
Dep tur ol: «Zor Táńirisin sıpattaıyn».
Nápsi kózin baılaǵan adamzattan,
Aıýan artyq sezedi ómir jaıyn.
Sýyr nege qazady taýdyń saıyn,
Jaz jıyp, qystyq azyq qylar daıyn.
Qys bolsa, shala ólerin qaıdan bildi,
Dedi me: «Azyq jastap bir uıyqtaıyn».
Sondaı ómir kelerin sezip turǵan,
Jan syry ǵoı, sizderge baıqataıyn.
Jańa týǵan jas qozy tamaq izdep,
Enesiniń emshegin tapqandaıyn.
Uıadan ushqan úırek bizdi aldaıdy,
Dalbyrlap qanat qırap jatqandaıyn.
Jaıyn ańdar úıirge qaramaıdy,
Eseptemeı týatyn mezgildi aıyn.
Qysty jerdiń qoıany kúzdi kúni,
Deı me: «Ádeıi qardaı bop aǵaraıyn».
Kógaldaǵy shegirtke jasyl bolyp,
Kórdiń be qyrdaǵysy qońyrqaıyn.
Osylar ózin-ózi jaratty ma,
«Jaýymnan túsimmen,– dep,– qutylaıyn».
Osyndaı taǵdyr syryn qýa berseń,
Túpsiz tereń, sondyqtan toqtataıyn.
Ǵylymda muny soqyr sezim deıdi,
Muny aıtqan ǵylym soqyr, óldá, ońbaıyn.
Meńireýden maqsut, bilim shyǵady dep,
Bútin álem aıtsa da, men nanbaıym.

---