Ia, Qudaıym aqqa jaq,
Ózińe aıan: men naqaq.
Aqqa degen jolymnyń
Abyroıyn ashpaı, jap.
Aıat penen hadıste
Adal nıet, aq iske,
Jańylmasam, joq edi
Jaza tartsyn degen bap.
Meni ustatyp, aıdatyp,
Zaǵyrdandy qaınatyp,
Masaırasyp, máz bolyp,
Qýanǵandy óziń tap!
Az kúndikke aldanyp,
Az nársege jaldanyp,
Adasqanyn Alashtyń
Túzý jolǵa túsir, haq!
Jaqyn jerden jaý shyǵyp,
Maqul sózden daý shyǵyp,
Dushpan ustap qolymnan,
Itter tistep tonymnan,
Maǵan tosý bolǵan shaq.
Tutqyn bolyp taryǵyp,
Jalǵyz jatyp zaryǵyp,
Ashý qysyp, oıdy alyp,
Ót jaıylyp, boıdy alyp,
Dert júrekke tolǵan shaq.
Qatty aıtty dep kektemeı,
Syıynǵandy tek demeı,
On eki ımam áýlıe,
Jıyrma segiz ánbıe,
Qolda, óńsheń arýaq!
Qara balýan Jánibek!
Qaz daýysty Qazybek!
Jetim qalǵan halqyńa,
Tulǵa bolyp artyńa,
Kim tıanaq qazyq ed?
Qunsyz bolyp erimiz,
Jesir bolyp jerimiz,
«Jan meniki» deı almaı,
«Mal meniki» deı almaı,
It pen qusqa azyq ek.
Baryn salyp talasqa,
Aryn satyp qalashqa,
«Jurt bolalyq» degen joq,
Jurt qaıǵysyn jegen joq,
İrip-shirip, azyp ek.
Muny kórip kózimiz,
Biriger dep sózimiz,
Ken bolar dep balshyqty,
Kól bolar dep shalshyqty,
Biz úmitpen qazyp ek.
Dáreti joq aıaqtar,
Qorsyldaǵan saıaqtar
Bylǵamasyn qasyńdy,
Qasıetti basyńdy! -
Degenimiz bolmasa,
Qazaqqa ne jazyp ek?!
Baılattyrǵan qolymdy,
Bógettirgen jolymdy,
Jaqynym bar, jatym bar,
Habarlana jatyńdar!
Men senderge júgindim,
Tóresi ádil - qazy dep!

---