«Ǵylymdar dúnıelik sıqyr bolmaq,
Oqyǵan ol ǵylymdy kápir bolmaq».
Zýlatyp sharıǵatty shart júginip,
Moldekeń otyrǵanda moınyn tolǵap.
Sondyqtan zaman júırik, bizder shaban,
Artynda ilese almaı júrmiz áman.
Kún saıyn ózgerilip, óner artyp,
Bári de bara jatyr alǵa taman.
«Zamanyń túlki bolsa, tazy bop shal» —
Degen sóz aıatpenen birdeı maǵan.
Alaqtap artymyzǵa qaraǵyshtap,
Júrgende-aq ozyp, uzap ketti zaman.
«Nárseni túske enbegen óńde kórdik,
Solardy tapqan — ǵylym» deımiz jaman.
«Ǵylym» dep neni úırendik bizder jasta,
(Aıtqanym beker bolsa, almaı tasta!
Tabylar aqtaıtyn da, boqtaıtyn da,
Sóz emes arnap jazǵan dos pen qasqa...)
Áıelmen pálen bar dep janasqanda,
«Pálen» dep uıqysyrap adasqanda,
Úıretý balalarǵa qandaı jaqsy,
Aqylǵa salyp, oılap, bal ashqanda.
Mektepte oqymaǵan bilmeı júr ǵoı
Jerdegi mal — maqulyq, qus aspanda.
Aıtamyn moldekeń joq ońashada,
Sóz bermes «kápirsiń» dep talasqanda.
Jazǵan sóz janym ashyp alashyma,
Alashtyń adasqan az balasyna.
Qannan qan, etten etim, baýyr jurtym!
Qaraǵan «Qarataýdyń» qalasyna.
İshi las, syrty taza zalymdardyń
Aldanyp qur syrtynyń tazasyna.
Máz bolyp baıǵazy alǵan balalarsha
Satylyp jyltyraǵan tanasyna.
Ábildiń1 zıaratyn attap ótip,
Qabyldyń bata qylma molasyna,
Qoryqqanǵa qos kórinip, qoıdaı úrkip,
Tyǵylyp tajaldyń buthanasyna,
Es ketip, sabyr qalmaı, sasqalaqtap,
Qoryqqannan kóziń syımaı sharasyna,
Umytyp Qudaıdy da, qurandy da,
Bas urma lánat-manat2 aǵashyna.


1 - Dinı ańyzdyń keıipkerleri.
2 - Qarǵys maǵynasyndaǵy aıtylǵan uǵym.

---