Bolǵan soń kásibi urlyq, ury zalym
Urlaýǵa uıat deı me jurttyń malyn?
Oıy aram, qany qara, ol naǵylsyn,
Bireýdi zar jylatpaq, zor obalyn!
Qudaı da, Quran da oǵan jalǵyz qaryn,
Sol úshin qara jerge kómgen aryn.
Ury enip bir Mujyqtyń saraıyna,
Sypyryp ketipti urlap qoımaı bárin.
Mujyǵym jatarda baı, tursa - sorly,
Baılyqtyń qur typ-tıpyl qalǵan orny.
Ahylap-ýhleıdi, ury alǵan soń
Terimen mandaıynyń jıǵan qordy.
Týysqan, kórshi, quda-qurmalasyn,
Dos-jaryn jıyp, Mujyq járdem surady.
«Qaıǵymdy, - Mujyq aıtty, - shaǵam, jurtym,
Senderden jaqyn kimdi tabam, jurtym!
Ushyrap zor qazaǵa, jaıym mynaý,
Ne kómek beresińder maǵan, jurtym?»
Jıylyp kelgen óńsheń jaqyndary,
Mujyqqa aqyl aıtyp jatyr bári.
Sorlyǵa bar múlkinen jurdaı bolǵan
Minekı bergen kómek-aqyldary.
Karp degen bólesi aıtty:
«Áýel basta Baı dep at kerek edi shyǵarmasqa!»
Qurdasy Klım aıtty:
«Munan bylaı Saraıdy úıden oqshaý saldyrmasqa!»
Aıtady kórshi mujyq bir jasyraq:
«Bolǵannan emes qoı bul saraı jyraq!
Qabaǵan, kisi alatyn tóbetterden
Qoraǵa qoımaǵannan ıt asyrap.
Qanshyǵym balalady kúni keshe,
Al sonan, aıamaımyn, kereginshe!
Birtalaı, úıshik tolǵan kúshigi bar:
İshinen tabylatyn qandaı dese.
Kórshime kóńili jarym qımaımyn ba,
Obalyn moınyma artyp, óltirgenshe!»
Júz aqyl bergen shyǵar kelgen bári,
Biri olaı, biri bulaı dep jasy-kári.
Aıamaı til kómegin berip-berip,
Bir adam qaraspady sózden ári.
Eı, Mujyq!
Jurtqa senbe, ózińe sen!
Óledi ashtan qonaq ári-sári.
Aýzyńdy qqrǵaq qasyq bosqa qajar,
Shyǵynǵa qur aıtqan sóz bolmas dári.
Bul sózdiń maǵynasy emes tereń,
Sonda da qorytýyn aıtyp berem:
Ár túrli synalatyn jer bolmasa,
Dostyqty, jaqyndyqty shyn-aq der em.
Jap-jaqyn jaıshylyqta kóp dos-jardy
Men nege jamandyqta sırek kórem?
Tar kezeń, talma jerde tabylý joq,
Qalady qulaqtary bolyp kereń.
Osyndaı dúnıeniń isin baıqap,
Dostyq pen jaqyndyqqa talǵap senem.

---