InfoHub Logo

Eldiń tuǵyrly, ǵumyrly bolýynyń basty jetekshi kúshi – ulttyq birlik. El ishinde tynyshtyq, yntymaq bıleýi úshin bárinen buryn eldiń ulttyq bútindigi qamtamasyz etilýi jáne eldi quraıtyn adamdar, ulttar, túrli toptar arasynda túsinistik pen ara-qatynastyń, tipti tilektestiktiń bolýy qajet. Eldi qalyptastyratyn faktorlardyń mańyzdy elementteri senim, otan, tarıh, baıraq, birlik, tatýlyq ishinde ómir súrý qalaýy. Mine osylar yntymaq, baq-berekeniń ortaq kilti. Tarıhqa kóz júgirtetin bolsaq kóp memleketter syrtqy kúshterdiń emes, ishki alaýyzdyqtyń, ishtegi satqyndar, dushpandar tarapynan ydyratylǵan. Qazirgi zamanda da munyń mysaldary kóp. Bul qaýip árkez tónip tur. Ulttyq jospary, ulttyq maqsattary bolmaǵan elder (saıası, ekonomıkalyq, mádenı) silkinister kezinde úlken jaraqattarǵa tap bolady. Úlken maqsattary, asqaq armandary bolmaǵan memleket damymaıdy, qatardaǵy qarapaıym elderdiń biri bolyp júre beredi. Temirqazyq juldyzyna jete almaımyz, biraq oǵan qarap baǵytymyzdy belgileımiz. Ulttyq jáne rýhanı qundylyqtarymyz, ulttyq birlik jáne ulttyq maqsattarymyz eldiń tutastyǵyn nyǵaıtýshy rýhanı kúsh. Ulttyq maqsattar (uzaq-orta-qysqa merzimdi) retinde josparlanýy kerek. Bul oraıda Elbasymyzdyń atqaryp jatqany eńbegi zor. «Indýstrıalyq-ınnovasıalyq damý baǵdarlamasy», «Ult jospary – 100 naqty qadam», «Qazaqstan – 2050», sekildi josparlary osy jolda jemisin berýde. Sondaı-aq ulttyq birlik pen ulttyq maqsattardy ýaǵyzdaýda jáne iske asyrýda tek saıasatkerler emes, zıaly qaýym, ǵalymdar, qoǵam qaıratkerleri, jalpy halyq bir aýyzdan at salysýy qajet.

Eldiń yntymaǵyn qamtamasyz etýdiń joly – bólinbeý. Arańdatýshylyqqa, iritkige jol bermeý. Qazaqstan – ártúrli ult, din, mádenıet ókilderi meken etetin altyn otanymyz. Ultymyz, dinimiz, mádenıetimiz ózgeshe bolýy múmkin. Jaqsy kóretin, jaqtyrmaıtyn adamdarymyz da ózgeshe bolýy múmkin. Biraq bir ortada, bir otanda ómir súrý úshin bulardyń eshqaısysy kedergi emes. 17 mıllıon halyqtyń barlyǵyn jaqsy kórýge májbúr emespiz, adamdardyń barlyǵyna jaqsylyq jasaýǵa májbúr emespiz, biraq eshkimge jamandyq etpeýge, eshkimge zıanymyzdy tıgizbeýge mindettimiz. Árkim óz turǵysynan ádil, adal bolýǵa, eshkimniń aqysyn jemeýge, ádep qaǵıdalaryn saqtaýǵa meılinshe tyryssa elimiz órkendeı bermek. Áleýmettik jelilerde ártúrli jazbalar, montajdalǵan vıdeolar, túbiri joq jalalar tolyp jatyr. Bir-birin jamandap, boǵaýyz sóz, boralap jatqandar da az emes. Máselen bir mysaldy kórsetip, bir ulttaǵy búkil adamdar nemese búkil musylmandar osyndaı jaman eken degen paıymdaýlar bar. Negizinde dushpandardyń qalaǵany osy. Halyqty bir-birine shaǵystyryp, aıdap salý. Dushpandardyń mundaı oıyndaryna qural bolýdan saqtaný kerek. Bes saýsaq birdeı emes. Kez kelgen qaýymnyń jaqsylary bolatynyndaı, jamany da bolýy múmkin. Bir jamandy kórdim dep bárine topyraq shashýdan aýlaq bolý kerek. Zamanymyz dushpan arttyrýydyń emes, dos arttyrýdyń, yntymaqtastyqtyń zamany. Maıda-shúıde keleńsizdikterdi tastap, aýyzbirlikke umtylýdyń zamany. Sondyqtan áleýmettik jelilerde, jalpy kez kelgen jerde bólinýshilikke, iritkige jol bermeýge bir aýyzdan at salysý kerek. Birligi myqty eldi jaý da, daý da ala almaıdy.   

---