ادام ساناسىنداعى كەدەرگىلەر
ۇلى ويشىل ءماشھۇر ءجۇسىپ ادامنىڭ اقىل-ويىن بيلەپ العان 3 كەدەرگى ءتۇرىن كورسەتىپ كەتكەن ەكەن. ءتورتىنشى كەدەرگىنى ءوزىم قوستىم جانە ولاردى اشىقتاپ وتەيىن.
ءبىرىنشى كەدەرگى — ادامنىڭ جەلكەسىندە تۇرادى. ونى كەرتارتپالىق دەيدى. ماسەلەن، مۇراتبەك ءبىر كەزدەرى وتىرىپ: «وسى مەن جالقاۋلىقتى قويىپ، ودان دا بارىپ اعىلشىن ءتىلىن ۇيرەنسەم قايتەدى» دەپ ويلايدى. ءبىراق جەلكەسى: «مۇراتبەك، قايتەسىڭ؟ اعىلشىن وقىماي-اق تا ادامدار نان تاۋىپ ءجۇر عوي. كەيىنىرەك وقي جاتارسىڭ» دەپ ۇستاپ قالادى. سول ادامنىڭ جەلكەسىنەن قىرىق ادام ۇستاپ وتىرادى ەكەن دەيدى ءماشھۇر ءجۇسىپ. سودان كەيىن ارينە تۇك ىستەي الماي قالاسىڭ.
ەكىنشى كەدەرگى — جالقاۋلىق. ول قۇيرىقتا بولادى ەكەن. ماسەلەن، قولىڭا تەلەفوندى ال دا، الەۋمەتتىك جەلىدە وتىرىپ كورشى. ورنىڭنان تۇرعىزباي قويادى، سولاي ما؟ جۇمىسىڭ كوپ ەكەنىن بىلەسىڭ. ءبىراق تەلەفوننان شىعا الماي قالاسىڭ.
ءۇشىنشى كەدەرگى — ۇيقىشىلدىق. بۇل دەگەنىمىز كۇنىنە 8-9 ساعات ۇيىقتاۋ ەمەس. كەي ادامدار بولادى، ۇنەمى ءبىر نارسەنى ويلاپ، ۋايىمداپ جۇرەدى. ءبىر نارسە جاساۋىم كەرەك ەدى دەپ، قۇر قيالمەن ءبىر شەتتە ۇيىقتاپ جۇرەدى. كەيىن ونداي جانداردىڭ ۇيقىدان ويانۋى قيىن بولادى.
ءتورتىنشى كەدەرگى — قورقاقتىق. بالكىم ارالارىڭىزدا كەرتارتپالىقتان ادا، جالقاۋ ەمەس، ۇيىقتاپ جۇرمەيتىن ادام بار شىعار. ءبىراق، ءبىر نارسە باستاردا قورقاقتىعى ۇستاپ قالۋى مۇمكىن. ول دا ءبىرىنشى كەدەرگى سياقتى جىبەرمەي قويادى. سوندىقتان، بۇل كەدەرگىنىڭ بارىنەن قۇتىلۋ ءۇشىن ادام وز-وزىنە بەلگىلى ءبىر دارەجەدە شەكتەۋ قويىپ وتىرۋ كەرەك.
الدىڭا ماقسات قوي دا، جوسپار قۇر. سول جوسپارمەن ارەكەت ەت. ماسەلەن، مەن قاعازعا جوسپارىمدى جازىپ، سول جوسپارمەن جۇرەمىن. ول جوسپارىمدى ورىندامايىنشا، مەن باسقا نارسەگە كوڭىل اۋدارمايمىن. سوندىقتان سىزگە ايتارىم، ادام جانى مەن جۇرەگىنىڭ قوجايىنى بولادى. ءبىراق، ءتانىڭ مەن ەرىك-جىگەرىڭە قوجايىن — ءوزىڭ. وسى ءتورت كەدەرگىدەن ارىلمايىنشا، ءسىز ەشقاشان العا جىلجي المايسىز.
بەيسەن قۇرانبەكتىڭ جازباسىنان
You Might Also Like
-
جاستىق شاقتا ادام سۇلۋقۇمار سەزىمنەن اسا الماي، تەك كورىكتى، سۇلۋ ايەل كوزدەيدى. ال سىرتى سۇلۋ قىزدىڭ ىشكى جان دۇنيەسى دە سۇلۋ بولىپ كەزدەسۋى — وتە سيرەك قۇبىلىس. سۇلۋ قىزعا ۇيلەنگەندەر جۇرە ...
