اقبوكەندى زەرتتەۋشى قازاق عالىمى Whitley Awards تابيعات قورعاۋ سىيلىعىنا يە بولدى
اقبوكەندى زەرتتەۋشى قازاقستاندىق عالىم البەرت سالەمگارەيەۆ تابيعاتتى قورعاۋ سالاسىنداعى بەدەلدى Whitley Awards 2023 جۇلدەسىن الدى.
سارسەنبى كۇنى كەشكە بريتاندىق Whitley Fund for Nature قايىرىمدىلىق قورى تابيعاتتى قورعاۋعا ۇلەس قوسقان التى ادامدى Whitley Awards سىيلىعىمەن ماراپاتتادى.
ماراپاتتاۋ ءراسىمى ۇلىبريتانيانىڭ كورولدىك گەوگرافيا قوعامىندا ءوتتى.
لاۋرەاتتاردىڭ ءبىرى - قازاقستان بيوسانالۋاندىقتى ساقتاۋ قاۋىمداستىعىنىڭ مۇشەسى البەرت سالەمگارەيەۆ بولدى، ول سىيلىقتى پوپۋلياسياسى 1،3 ملن-نان اساتىن اقبوكەندى ساقتاۋ ىسىنە قوسقان ۇلەسى ءۇشىن الدى.
«البەرت جانە ونىڭ كومانداسى كورولدىك ۆەتەريناريا كوللەدجىمەن جانە ازىق-تۇلىك جانە اۋىل شارۋاشىلىعى ۇيىمىمەن جۇمىس ىستەي وتىرىپ، بولاشاقتا جابايى جانۋارلار اۋرۋلارىنىڭ وشاقتارىن انىقتاۋ جانە ولارعا ارەكەت ەتۋ سحەماسىن ازىرلەدى»، - دەدى قازاقستاندىق تابيعاتتى قورعاۋشىنىڭ زەرتتەۋ پرەزەنتاسياسىندا.
«البەرت اقبوكەندەردى 2006 جىلدان بەرى زەرتتەپ، ولاردىڭ دارالارىنا ارنايى تاراتقىشتارى بار قارعىنى ورناتۋ ارقىلى سپۋتنيكتىك تاڭبالاۋ باعدارلاماسىن باسقارىپ كەلەدى»، - دەپ حابارلادى قازاقستاننىڭ ۇلىبريتانياداعى ەلشىلىگى Facebook جەلىسىندەگى پاراقشاسىندا.
2009 جىلدان بەرى بارلىعى 186 جانۋارعا ەڭ سالىنىپ، الىنعان مالىمەتتەر ولاردىڭ تولدەۋ كەزىندە شوعىرلانۋ ورىندارىن انىقتاپ تۇسىنۋگە ىقپال ەتكەنى اتاپ ءوتىلدى.
بۇل دەرەكتەر «التىن دالا» رەزەرۆاتىن قۇرۋ جانە ىرعىز-تورعاي مەملەكەتتىك تابيعي رەزەرۆاتىنىڭ اۋماعىن كەڭەيتۋ ءۇشىن پايدالانىلدى.
جانۋارلاردىڭ قونىس اۋدارۋ جولدارىنىڭ كارتالارى ولاردىڭ تەرىس اسەر ەتۋ ءقاۋپىن ازايتۋ ءۇشىن جول ينفراقۇرىلىمىن جوسپارلاۋدا قولدانىلادى.
لاۋرەاتتارعا سىيلىقتى تابيعاتتى Whitley Fund for Nature قورىنىڭ قامقورشىسى ۇلىبريتانيا حانشايىمى اننا تابىس ەتتى.
جەڭىمپازدار جوبالارىن دامىتقانى ءۇشىن £40 000 كولەمىندە گرانت الدى.
ا.سالەمگارەيەۆ جانە ونىڭ كومانداسى بۇل قاراجاتقا جابايى جانۋارلاردىڭ سۋارۋ ورىندارىنا كەدەرگىسىز كىرۋى جانە مال ۇستايتىن جەرگىلىكتى تۇرعىندارمەن سۋ رەسۋرستارىنا قاتىستى جانجالداردىڭ الدىن الۋ بويىنشا شەشىم ىزدەستىرۋ ءۇشىن زەرتتەۋ جۇرگىزەدى.
You Might Also Like
-
اتاقتى پسيحولوگ ءبىر كونفەرەنسياسىندا “كىمدى جاقسى كورسەڭىز، وعان بارىپ جاقسى كورگەنىڭىزدى اشىق ايتىڭىز”، — دەگەندى ايتادى. ءبىر اپتا وتكەندە پسيحولوگقا ءبىر جاس جىگىت تەلەفون سوعادى:
-
قازاقستاندا عىلىمي اتاقتار ءۇشىن قوسىمشا اقى تولەنەتىن بولادى. بۇل تۋرالى ادىلەت ءمينيسترى ازامات ەسقارايەۆتىڭ توراعالىعىمەن وتكەن ۆەدومستۆوارالىق كوميسسيا وتىرىسىندا ايتىلدى.
