InfoHub Logo

قازاقستاندا عىلىمي اتاقتار ءۇشىن قوسىمشا اقى تولەنەتىن بولادى. بۇل تۋرالى ادىلەت ءمينيسترى ازامات ەسقارايەۆتىڭ توراعالىعىمەن وتكەن ۆەدومستۆوارالىق كوميسسيا وتىرىسىندا ايتىلدى.

پارلامەنت سەناتى دەپۋتاتتارىنىڭ باستاماسىمەن عىلىم جانە جوعارى ءبىلىم مينيسترلىگىنە «ق ر كەيبىر زاڭنامالىق اكتىلەرىنە عىلىم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «عىلىم ماسەلەلەرى بويىنشا سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» ق ر كودەكسىنە وزگەرىستەر مەن تولىقتىرۋلار ەنگىزۋ تۋرالى«زاڭ جوبالارى ەنگىزىلدى.

«پرەزيدەنت تاپسىرماسىن ورىنداۋ ماقساتىندا زاڭ جوبالارى اياسىندا عىلىمي-پەداگوگيكالىق قىزمەتتى جۇزەگە اسىراتىن پەداگوگتارعا، سونداي-اق بازالىق جانە ىرگەلى قارجىلاندىرۋ شەڭبەرىندە نەگىزگى جۇمىس ورنى بويىنشا عىلىمي-زەرتتەۋ جانە تاجىريبەلىك-كونسترۋكتورلىق جۇمىستارمەن اينالىساتىن عىلىمي قىزمەتكەرلەرگە عىلىمي اتاقتارى ءۇشىن قوسىمشا اقى تولەۋ تۋرالى تۇزەتۋ قولداۋ تاپتى»، - دەدى عىلىم جانە جوعارى ءبىلىم ۆيسە-مينيسترى كاميل اقاتوۆ.

عىلىم جانە جوعارى ءبىلىم مينيسترلىگى عىلىم كوميتەتىنىڭ ءتوراعاسى دارحان احمەت-زاكيدىڭ ايتۋىنشا، عىلىم كانديداتى قازىرگى ۋاقىتتا عىلىمي دارەجەسى ءۇشىن 17 اەك (1 اەك – 3450 تەڭگە) السا، ەندى ول 25 اەك-كە دەيىن كوتەرىلەدى، سونداي-اق «قاۋىمداستىرىلعان پروفەسسور» اتاعى قوسىلادى.

«ەگەر ونىڭ «پروفەسسور» عىلىمي اتاعى بولسا، بۇل كورسەتكىش 50 اەك-كە دەيىن وسەدى. ياعني، بۇرىن عىلىمي اتاق ءۇشىن تولەنبەيتىن، ال ءقازىر وسى باستاما اياسىندا پارلامەنت زاڭ شىعارعان سوڭ قوسىمشا اقى تولەۋ مۇمكىندىگى بولادى»، - كوميتەت ءتوراعاسى.

سونداي-اق ارنايى زاڭ جوباسىندا ۇيىمنىڭ بيۋدجەت قاراجاتىنان تىس ەسەبىنەن ورتاشا جالاقىسى ساقتالا وتىرىپ، ءبىر جىلعا دەيىن شىعارماشىلىق دەمالىس بەرۋ ماسەلەسى قارالدى. بۇل رەتتە شىعارماشىلىق دەمالىس 10 جىلدا ءبىر رەتتەن ارتىق بەرىلمەيدى. الەمدىك تاجىريبەگە سايكەس، مۇنداي دەمالىس اقش، گەرمانيا، رەسەي جانە وزگە دە كوپتەگەن وزىق ەلدەردە بەرىلەدى.

«ءبىز قاراستىرعان تاعى ءبىر ماسەلە – بيزنەس قارجىلاندىراتىن جۇمىستارعا قاتىستى. بۇدان بىلاي ولاردىڭ عىلىمي نەمەسە ينجەنەرلىك-سەرۆيستىك جۇمىس ەكەنىن انىقتاۋ ءۇشىن بەلگىلى ءبىر دارەجەدە ساراپتامادان ءوتۋ ۇسىنىلادى. قازىرگى ۋاقىتتا ءبىرقاتار بيزنەس قۇرىلىمدار عىلىمي-زەرتتەۋ جۇمىستارىنا جاتپايتىن جوبالاردى قارجىلاندىرىپ ءجۇر. بۇل بولىككە اشىقتىقتىڭ بەلگىلى ءبىر دارەجەسىن ەنگىزۋ قاجەت»، - دەپ تولىقتىردى د. احمەت-زاكي.

سونىمەن بىرگە، سپيكەر عىلىم جانە تەحنولوگيالار جونىندەگى ۇلتتىق كەڭەس وتىرىسىنداعى پرەزيدەنت تاپسىرماسىمەن «سۋپەر شەگەرىمدەر» دەپ اتالاتىن سالىقتىق جەڭىلدىكتەر مەن ينۆەستيسيالىق پرەفەرەنسيالار بىرتىندەپ ەنگىزىلەتىنىن اتاپ ءوتتى.

«جەڭىلدىكتەر ارقىلى تارتىلاتىن ينۆەستيسيالار جىلدان-جىلعا ارتىپ، مۇددەلى كاسىپورىندار تاراپىنان قارجىلاندىرىلادى دەپ سانايمىز. قازىرگى ۋاقىتتا عىلىمعا اقشالاي قاراجات نەگىزىنەن مەملەكەت تاراپىنان اۋدارىلۋدا، جىل سايىن 50 ملرد تەڭگەدەن استام قارجى بولىنەدى. قارجىلاندىرۋدى 1 ترلن تەڭگەگە دەيىن ارتتىرۋ مىندەتىن ەسكەرسەك، ءبارىن مەملەكەتتىك باستامالار ەسەبىنەن قارجىلاندىرۋ مۇمكىن ەمەستىگى تۇسىنىكتى. ولار عىلىم مەن يننوۆاسيانى دامىتۋعا اقشالاي قاراجات سالۋعا مۇددەلى بولۋى ءۇشىن بيزنەسكە جاعداي جاساۋ قاجەت. جاڭا باستامالاردا بيزنەس تە پايدا تاباتىنىن اتاپ وتكىم كەلەدى»، - دەيدى كوميتەت وكىلى.

---